Kryeministri Renzi: Asnjë nuk do të lihet vetëm
Tërmeti i fuqishëm, që ka shkaktuar vdekje të shumta dhe dëme materiale në Itali, ka marrë reagimin e personaliteteve brenda dhe jashtë vendit. Kryeministri Matteo Renzi ka anuluar udhëtimin e tij për në Paris, që do të kryente sot dhe ka falënderuar të gjithë ata që kanë gërmuar me duar për të nxjerrë të mbijetuar. Në një konferencë të shkurtër për shtyp nga pallati “Chigi”, Kryeministri italian, Matteo Renzi, tha se prioritet është gërmimi. “Në momente vështirësie Italia di si të sillet, tregon fytyrën e saj më të bukur. Marrim angazhimin që askush të mos mbetet vetëm, asnjë familje, asnjë komunë, asnjë fraksion. Dhe i futemi punës”. Pasdite ai ka vizituar zonat e goditura nga tërmeti. Edhe Papa ka ndryshuar planet e tij dhe do të lutet për viktimat e tërmetit. Ndërkaq, shumë liderë botërorë kanë shprehur solidaritetin e tyre. Që nga Rusia, Gjermania, SHBA- të e vende të tjera. BE është mobilizuar për të ndihmuar Italinë. Kryediplomatja e BE- së, Federica Mogherini, i ka telefonuar Presidentit italian, Sergio Mattarella. Po ashtu edhe Presidenti amerikan, Barack Obama, dhe ai rus Vladimir Putin, të cilët janë shprehur të gatshëm për të ndihmuar me mjete dhe asistencë në zonat e dëmtuara.