“Jemi pranë jush në këto ditë të vështira”

Tirana zyrtare është solidarizuar me familjet viktimave që humbën jetën nga tërmeti i fuqishëm që goditi qytetet e Italisë Qendrore. Krerët e lartë të shtetit dhe të politikës u kanë dërguar mesazhe ngushëllimi homologëve të tyre italianë. Kreu i shtetit, Bujar Nishani, i ka dërguar një mesazh Presidentit të Republikës italiane, Sergio Mattarella, të cilit i ka shprehur ngushëllimet e shtetit shqiptar për humbjen e jetëve njerëzore nga tërmeti i fuqishëm. “Lutem e shpresoj që nën rrënojat e godinave të shembura të mos ketë më viktima të tjera, ndërsa të lënduarve u uroj shërim sa më të shpejtë”, përfundon mesazhi i Presidentit Nishani. Ndërkaq, kryetari i Kuvendit, Ilir Meta, i ka dërguar një telegram ngushëllimi kryetares së Dhomës së Deputetëve, Laura Boldrini dhe kryetarit të Senatit italian, Pietro Grasso, për tragjedinë e shkaktuar nga tërmeti i rëndë. “Të gjithë anëtarët e Kuvendit të Shqipërisë dhe unë personalisht qëndrojmë pranë Jush dhe popullit mik italian në përballimin e dhembjes së përbashkët njerëzore dhe të pasojave katastrofike e dëmeve njerëzore, morale dhe materiale, si pasojë e këtij tërmeti të tmerrshëm”, thuhet në telegramin e Metës. Kryeministri Rama ka postuar një mesazh ngushëllimi në faqen e tij në Facebook: “Një ditë e trishtueshme për Italinë mike! Ngushëllimet më të ndjera për viktimat e tërmetit e solidaritet vëllazëror me popullin e qeverinë!”. Edhe kreu i opozitës, Lulzim Basha, është solidarizuar me familjet e viktimave në Itali. “Jemi pranë familjeve të bashkëqytetarëve tanë dhe ju urojmë shërim sa më të shpejtë të plagosurve. Ngushëllime familjeve të viktimave. Mendimet dhe lutjet tona janë me të lënduarit dhe familjet e viktimave”, shkruan Basha.