Kapet duke ujitur parcelat me hashash, arrestohet 54- vjeçari
TIRANE - Një 54- vjeçar është arrestuar në flagrancë nga Policia e Tiranës, teksa ujiste parcelat me hashash, që kishte mbjellë në një zonë të pyllëzuar. Burime nga Policia thanë se shtetasi Agim Boga është arrestuar gjatë një aksioni të Komisariatit nr. 4, të cilët kanë asgjësuar me djegie 200 rrënjë kanabis. Shërbimet kishin nisur aksionin në terren menjëherë pas një informacioni të marrë në rrugë operative se, në fshatin Lanabregas, të Njësisë Administrative të Dajtit, në një zonë të pyllëzuar, janë kultivuar bimë narkotike. Pas këtij informacioni është ngritur një grup kontrolli, të cilët kanë shkuar në adresën e dhënë, ku kanë konstatuar tri parcela, të cilat ishin pranë njëra- tjetrës, si dhe shtetasin Agim Boga. Policia tha se, në momentet që është arrestuar ky shtetas po kryente vaditjen e parcelave. "Në tri parcelat e konstatuara janë gjetur të kultivuara rreth 200 bimë të dyshuara si narkotike, të cilat janë asgjësuar me anë të djegies. Materialet hetimore i kaluan Prokurorisë së Rrethit Gjyqësor Tiranë për veprën penale ' kultivim i bimëve narkotike'", tha dje zyrtarisht Policia e Tiranës.