Shehu premton ulje tatimesh: Asnjë taksim për biznesin e vogël
Kandidati për Bashkinë e Dibrës, Sherefedin Shehu, në mitingun e prezantimit të tij ka folur për projektet konkrete që do të zbatojë nëse do të zgjidhet si kryebashkiak. Ai tha se do të bëjë zero taksën e biznesit të vogël dhe do të caktojë fond të posaçëm për të paguar energjinë për familjet në nevojë. Shehu premtoi se do të mbështesë linjat e prodhimit, baxhot dhe fermat për të nxitur prodhimin vendës. Ndërkohë që premtoi mbështetje për blegtorët dhe asfaltim të rrugëve të qyteteve. “Përvoja dhe besimi që kanë tek unë partnerët dhe institucionet financiare vendëse dhe të huaja do të sjellë investime për shfrytëzimin e burimeve minerale të gipsit dhe gurit të kuq, si edhe të burimeve të tjera që ka Dibra. Ndërsa në bashkëpunim me Agjencinë Gjermane për Zhvillim ( GIZ) do të punojmë për identifikimin dhe mbështetjen e projekteve për zhvillimin e turizmit familjar, si shtëpitë pritëse apo hanet, shtigjet turistike etj.”, tha Shehu. Por si do t’i gjejë ai fondet? “Përvoja, integriteti dhe besueshmëria ime janë garanci për sigurimin e financimit të projekteve nga institucionet financiare ndërkombëtare dhe donatorët. Por garanci mbi garancitë, e imja dhe e juaja, e të gjithëve ne, është Kryeministri i ardhshëm Lulzim Basha, i cili Dibrën e ka pasur e ka dhe do ta këtë në prioritet e tij. E jo vetëm kaq, por së bashku me Lulzim Bashën, ne do të përfundojmë atë që nisëm, Rrugën e Arbrit, prandaj mbështetja juaj për mua mbetet garancia më e madhe për kthimin e punës dhe dinjitetit të Dibrës”, tha dje Shehu.