TKOBAP, Zana Çela dhe Josif Gjipali, dy emrat në tryezën e Edi Ramës
Ashtu siç edhe pritej, dy emrat kandidatë për drejtorin e Përgjithshëm të Teatrit Kombëtar të Operës dhe Baletit janë Zana Çela dhe Josif Gjipali. Pas shqyrtimit të dosjeve të 6 konkurrentëve dhe intervistave me ta, komisioni vendosi të çojë përpara Kryeministrit emrat e Çelës dhe Gjipalit. Sipas njoftimit zyrtar të Ministrisë së Kulturës, ministrja Mirela Kumbaro ka pranuar këto dy propozime të komisionit, për t’i përcjellë më pas drejt Kryeministrisë. Kryeministri Edi Rama pritet që të firmosë për njërin prej tyre në mbledhjen e Qeverisë që do të zhvillohet ditën e mërkurë, ndërsa drejtori i ri do të prezantohet në Teatrin Kombëtar të Operës dhe Baletit ditën e enjte. Për postin e drejtorit të Përgjithshëm të TKOBAP kandiduan 6 emra: Zana Çela, Josif Gjipali, Agim Hushi, Ylber Gjini, Kleanthi Gjika dhe Gëzim Xhaxhaj. Pas shqyrtimit të dosjeve të tyre dhe një bisede përballë komisionit të zgjedhur nga Ministria e Kulturës ( Elira Kokona, sekretarja e Përgjithshme e MK; Herida Duro, drejtore e Krijimtarisë dhe Edukimit përmes Kulturës; Ornela Cikuli, drejtoreshë e Shërbimeve të Brendshme; Jusuf Beshiri, muzikolog dhe Hervin Çuli drejtor i Teatrit Kombëtar), u përzgjodhën si më bindëset platformat e propozuara nga producentja Zana Çela dhe tenori Josif Gjipali. Në platformën e saj, Çela i mëshonte shumë ndërtimit të një kalendari që do të thithë audienca të të gjitha moshave, sidomos ato të reja dhe marketingut dhe promocionit, për të çuar më pranë publikut produksionet e këtij institucioni. Çela u paraqit shumë e qartë në prezan- timin e saj, por çka ajo mund “t’i trembej” do të ishte e shkuara e saj si ish- drejtore në TKOBAP, në një periudhë të trazuar, që u shoqërua me greva urie nga ana e artistëve. Nga ana tjetër, Gji- pali, me një karrierë të suksesshme artistike jashtë Shqipërisë, premtoi të shfrytëzonte të gjitha njohjet e tij në arenën kombëtare dhe ndërkombëtare për të kaluar çdo lloj vështirësie që paraqet sot TKOBAP, qoftë në infrastrukturë, ashtu edhe në vokale. Ai e shihte periudhën e rikonstruksionit të godinës së TKOBAP, si një periudhë të favorshme për rritjen artistike të trupës.