Mbytja në gropën e firmës, hetim pronarit e komunarëve
Policia: Administratori i fabrikës shpërdoroi tokën
Humbja e jetës së dy kushërinjve një javë më parë, në fshatin Qatrom të Korçës, ka hedhur dritë mbi abuzimet dhe shkeljet e bëra nga firma dhe neglizhencën e autoriteteve.
Sipas grupit hetimor, ngjarja tragjike mund të ishte shmangur nëse pronarët e firmës do të kishin përmbushur dokumentacionin dhe rregullat, dhe nga ana tjetër nëse aktiviteti i saj do të ishte kontrolluar siç duhej, dy djemtë Berti dhe Rei Tahirllari sot do të ishin gjallë, pranë familjeve të tyre. Pas kësaj ngjarjeje të rëndë, ku dy kushërinjtë humbën jetën duke u mbytur në mënyrë tragjike në ujërat e në grope me ujë të krijuar nga një firmë private, hetimet kanë hedhur dritë mbi shkeljet e kryera nga firma dhe ishdrejtuesit vendorë, duke nisur edhe procedimin penal për tre persona. Administratori i shoqërisë, e cila ka shfrytëzuar tokën, gjithashtu ish- kryetari i komunës Drenovë, si edhe administratori i kësaj njësie administrative akuzohen për "shpërdorim detyre". Sipas të dhënave të hetimit mësohet se në lidhje me ngjarjen e ndodhur më 19 gusht, në fshatin Qatrom, në të cilën humbën jetën shtetasit A. T. dhe R. T., duke u mbytur në vendin e quajtur "Gropa e Danielit", filloi procedimi për veprën penale "shpërdorimi i tokës" ndaj shtetasit: Vasil Kapurani, 53 vjeç, banues në Korçë, me detyrë administrator i kësaj shoqërie private në fushën e qeramikës. Nga verifikimet e kryera kjo shoqëri ka rezultuar me mangësi në dokumentacionin e paraqitur, si edhe në mënyrën e shfrytëzimit të tokës, pikërisht në gropën ku humbën jetën dy kushërinjtë. Por edhe ishkryekomunari i Drenovës, Flamur Sala dhe administratori aktual i kësaj njësie, Marsel Mejdanlli, janë proceduar penalisht, pasi akuzohen se kanë shpërdoruar detyrën duke neglizhuar kontrollin e aktivitetit të firmës në territorin e kësaj njësie. Dy kushërinjtë u mbytën në ujërat e kësaj grope, pasi kishin shkuar për t'u larë, ndërsa sipas specialistëve shkak u bë përbërja argjilore e saj, e cila ka veti thithëse. Ngjarja e rëndë ndodhi më 19 gusht, kur dy të rinjtë kishin shkuar për t'u larë. Familjarët e tyre u shqetësuan, pasi dy kushërinjtë nuk po ktheheshin në shtëpi. Ishte një shok i tyre që gjeti në breg rrobat dhe atletet e dy djemve, i cili i alarmuar njoftoi policinë. Pas disa orësh kërkimi, familjarët nuk arritën dot t'i gjejnë, duke kërkuar ndihmën e palombarëve, të cilët të nesërmen e fatkeqësisë i gjetën të mbytur kushërinjtë. Gropa ka një thellësi që varion nga 5 deri në 8 metra.