Hasani: Nuk e kemi të lehtë kundër Shqipërisë
"Kuqezinjtë janë ekip i fortë dhe favoritë për të fituar"
Maqedonia do të sfidojë kuqezinjtë me pesë futbollistë shqiptarë në përbërje.
Trajneri i Kombëtares fqinje ka publikuar listën e futbollistëve që do të ketë në dispozicion në këtë sfidë. Disa prej atij kontingjenti janë shqiptarë që posedojnë një pasaportë maqedonase. Një prej tyre është edhe lojtari kryesor dhe një nga më të mirët e skuadrës së Shkëndijës së Tetovës. Ferhan Hasani ka folur rreth takimit të parë kualifikues për edicionin e "Rusi 2018". Më 5 shtator, ai dhe katër shqiptarët e tjerë, së bashku me shokët e përfaqësueses do të jenë në fushë kundër Kombëtares së të gjithë shqiptarëve. Hasani, në një deklaratë për mediat pas ndeshjes në Ligën e Europës, ku Shkëndija humbi edhe takimin e kthimit nga Gent, ka shfajësuar futbollistët sh- qiptarë që nuk janë të gjithë pjesë e Kombëtares kuqezi, por luajnë në ekipe të ndryshme përfaqësuese. "Do të jetë e vështirë të luajmë ndaj Shqipërisë, por ne nuk jemi fajtorë që shqiptarët janë të ndarë dhe janë pjesë e kombëtareve të ndryshme në vende të caktuara", ka deklaruar Hasani. Kjo fjalë e tij nënkupton zhvillimet gjeopolitike ndër vite që kanë bërë të mundur emigrimin e shqiptarëve ndër vite, apo edhe faktin që kanë mbetur shumë shqiptarë jashtë kufijve zyrtarë të Shqipërisë.
FAVORITI
Sa i përket takimit, për futbollistin e Shkëndijës, kuqezin- jtë janë skuadër cilësore dhe do të jenë favoritë për fitimin e takimit. "Ne do të bëjmë maksimumin tonë për të marrë më të mirën, mirëpo Shqipëria ka skuadër më të mirë. Jo vetëm për këtë, por shtuar edhe faktorë të tjerë, bëjnë që Shqipëria të jetë favorite në këtë ndeshje", ka deklaruar Hasani.