Basha pranon gabimin e PD, Rama: Import për lëndë të parë, jo plehra
“Ngritja e mbi 64 mijë qytetarëve ishte zile zgjimi për ne”
Kryetari i opozitës, Lulzim Basha, pranoi se vendimi i PD- së për të miratuar ligjin e importit të mbetjeve në vitin 2011 ishte i gabuar.
Reflektimin e tij në lidhje me këtë ligj, Basha deklaroi se e ka marrë pas mbledhjes së firmave të 64 mijë qytetarëve kundër importit të mbetjeve në Shqipëri. “Partia Demokratike e ka lexuar vullnetin e qytetarëve shqiptarë. E lexoi edhe kur firmat u mblodhën, edhe kur ndaj ligjit që ne kishim aprovuar në vitin 2013 u dekretua referendumi, do të respektohej vullneti i qytetarëve. Sot jemi në pozitat e një reflektimi të dyfishtë. PD- ja dhe unë personalisht. Dua të ndaj me ju dhe qytetarët shqiptarë një reflektim personal si kryetar i opozitës. Në kushtet dhe në dijeninë e plotë të rrethanave kombëtare, rajonale dhe ndërkombëtare gjykoj se ligji që ne propozuam për importin e plehrave ka qenë një vendim i gabuar”, sqaroi Basha. Në një komunikim me mediat, kreut i PD-së vullneti i qeverisë në vitin 2011 ishte i mirë, duke menduar se po vepronte në favor të interesit publik. “Ka një evoluim të qëndrimit të Partisë Demokratike dhe ka një reflektim timin personal në këtë drejtim. Ne besuam në atë moment se po vepronim në favor të interesit publik. Ngritja e mbi 64 mijë qytetarëve në këmbë ishte pa dyshim një kambanë, një zile zgjimi për ne. Mendoj se vullneti ka qenë një vullnet i drejtë për të disiplinuar dhe kontrolluar mbetjet e rrezikshme nga njëra anë, dhe për t’i dhënë frymëmarrje industrisë së riciklimit nga ana tjetër”, tha Basha.
REFERENDUMI Kreu i PD- së deklaroi se deputetët e Grupit Parlamentar të opozitës do të bëjnë gjithçka për të ndalur hyrjen në fuqi të ligjit, duke mbledhur firmat e nevojshme edhe për të kërkuar thirrjen e një referendumi. “Ne po shqyrtojmë edhe ushtrimin e të drejtës parlamentare për t’i kërkuar Kuvendit që të miratojë një referendum për ndalimin e importit të plehrave. Kërkesë që kërkon nismën e 28 deputetëve dhe pastaj miratimin e Kuvendit”, tha kreu i PD. Kreu i opozitës theksoi se Partia Demokratike është e vendosur që të kufizojë pushtetin shtetëror dhe të fuqizojë atë të qytetarëve. Iniciativën për të penguar hyrjen në fuqi të ligjit për mbetjet, Basha e nisi me një thirrje publike për kreun e shtetit për të mos dekretuar ligjin e miratuar të enjten e kaluar nga qeveria. Për kreun e PD- së, një vend që ka prioritet turizmin nuk mund të ketë kurrsesi prioritet importin e mbetjeve. “I kërkojmë Presidentit të Republikës mosdekretimin e projektligjit dhe kthimin e tij në Kuvend. Rrethanat e diktojnë këtë. Një vend që shpall prioritet turizmin, nuk mund të ketë prioritet në të njëjtën kohë importimin e mbetjeve. Duhet zgjedhje. Duhet të zgjedhim akoma më shumë kur strukturat tona shtetërore, vetë shteti ligjor, policia, doganat, gjyqësori, qeveria janë lehtësisht të korruptueshme apo të paafta, apo të dobëta për t’u bërë ballë presioneve të jashtëzakonshme që vijnë nga grupe të fuqishme të interesit, siç është mafia ndërkombëtare e plehrave”, tha Basha. Partia Demokratike do të mbështesë protestën e shoqërisë civile, më 1 tetor. Kreu i opozitës, Basha, sqaroi se PD- ja nuk do të bëjë asnjë përpjekje për të zëvendësuar zërin e shoqërisë civile, por falë instrumenteve të saj do të protestojë. “Protesta është e tyre do të ketë mbështetjen tonë të plotë. Nuk do të ketë asnjë përpjekje për të zëvendësuar zërin e tyre. Protes- ta do të ketë mbështetje të fuqishme. Pse? Është bërë e qartë tashmë që ky është një shtet, kjo është një qeveri që u shërben vetëm interesave të klientelës së ngushtë dhe për këtë është e gatshme të dëmtojë interesat e gjithë shqiptarëve, siç është rasti i plehrave, siç është rasti i drogës, siç është rasti i maturantëve”, deklaroi Basha.