Rama në Grupin e PS për ligjin e mbetjeve: Diskutoni për risitë

Në mbledhjen e djeshme të Grupit Parlamentar socialist, Kryeministri Rama u kërkoi deputetëve që të përgatiten që në seancën plenare t’u përgjigjen akuzave të opozitës dhe të ambientalistëve për ligjin e importit të mbetjeve. Burime nga mbledhja e Grupit Parlamentar pohuan se kreu i qeverisë u tha deputetëve se duhet të japin në diskutimet e tyre risitë e ligjit të ri, i cili është krejt ndryshe nga ligji i vitit 2013. Kryetari i Grupit Parlamentar ka njoftuar deputetët se miratimi i ligjeve që shoqërojnë ndryshimet kushtetuese të Reformës në Drejtësi nuk do të kalojnë të enjten në Kuvend për miratim, por më 6 tetor, një javë më vonë. Për këtë, Ruçi ka dhënë disa arsye. Motivi i parë lidhet me mungesën e një pjese të mirë të ligjvënësve të enjten, të cilët ndodhen jashtë vendit në udhëtime zyrtare. Disa prej tyre në Këshillin e Europës, të tjerë në Komisionin Europian. Për miratimin e 6 ligjeve maxhoranca nuk mund t’i lejojë vetës mungesa që rrezikojnë 84 votat. Motivi i dytë lidhet me një kusht të artikuluar në Komisionin e Reformës nga LSI, e cila kërkon faturën financiare të tërë Reformës, rritjen e pagave dhe koston e ndërtimit të godinave të reja. Për këtë arsye, gjatë javës që vjen deputetët do të koordinojnë me qeverinë për të përcaktuar shifrat finale, se sa do të rëndojë në buxhet reformimi i Drejtësisë, para se ta miratojnë paketën e ligjeve. Mësohet gjithashtu se deputetët janë lajmëruar se ditën e shtunë do të mblidhet Asambleja Kombëtare e PS- së, në të cilën do të miratohen rregulloret që shoqërojnë statutin e ri të partisë.