Rrugë e re në Farkë, Veliaj: Standarde të njëjta
Lundra me Farkën tashmë lidhen përmes një rruge me standarde bashkëkohore. Duke ndjekur nga afër punimet, kryetari i Bashkisë, Erion Veliaj, vuri në dukje se Bashkia synon të realizojë investime të njëjta jo vetëm në qendër, por dhe në periferi. “Falënderoj kolegët që janë përkushtuar për këtë investim cilësor. E vlerësoj shumë, sepse ka qenë gjithmonë sfidë se si të krijojmë një kohezion midis njësive të reja, që i janë bashkuar Tiranës dhe qendrës së qytetit. Ky është një investim, i cili ndihmon lidhjen mes zonës së Lundrës dhe Farkës, për 3 mijë banorë që kanë zgjedhur të jetojnë këtu”. Bashkia e Tiranës ka hartuar një plan për të gjitha rrugët lidhëse mes fshatrave që jo vetëm do të përmirësojnë ndjeshëm infrastrukturën, por parashikohet të rrisë ndjeshëm vlerën e pronës. “Kemi një plan rrjetesh që lidhin fshatrat jo vetëm këtu në Farkë, por edhe në Petrelë, Bërzhitë, në Krrabë, sidomos me rrugën kryesore që lidh Krrabën me autostradën Tiranë- Elbasan”, vuri në dukje Veliaj. Sipas kryebashkiakut, investimet e Bashkisë janë edhe impakt i taksës së pronës, e cila për herë të parë këtë vit është vjelur në masën 93%.