Historia e shoqes së Nexhmije Hoxhës, që u zhduk pas luftës
Aq sa befasues ka qënë arrestimi i Hatlije Tafanit në mesnatën e 15 majit ' 45, po aq tronditës ka pasuar lajmi se ajo akuzohej si autorja e një vrasje te stadiumi "Dinamo" dhe e tre letrave me përmbajtje kundër regjmit. Vajza që s'kishte asnjë lidhje me njerëzit e klasave të përmbysura, me tregëtarët e floririt dhe përfaqësuesit e mbretit Zog, për policinë sekrete rezultonte se bashkëpunonte me ta. Ndodhte kjo kur 25 vjeçarja nga Tirana, viktimë e asaj nate të zezë, njihej në qytet dhe në rrethina, për kontribute të spikatura në luftën çlirimtare. Ajo kishte qenë nga të parat ndër moshataret e saj, që ishte bërë pjesë e lëvizjes komuniste dhe kishte luftuar në radhët e formacioneve partizane kundër okupatorëve nazifashistë. Lajmin për arrestimin e saj e bënte akoma më misterioz fakti që Hatlija ishte një nga shoqet e afërta të Nexhmije Hoxhës, gruas së shefit të regjimit dhe Fiqrtete Shehut e Liri Belishovës, me të cilat kishte ndarë dit- netët e vështira të ilegalitetit dhe lufimeve në Tiranë. Arrestimi dhe zhdukja pa gjurmë e saj, s'u sqarua asnjëherë e plotë. Thanë se e kishin vrarë dhe varrosur fshehtas. U fol që kishte vrarë vehen. Zëra të tjerë pohonin se e kishin gjetur të coptuar në kazanin e plehrave të spitalit. Drama e mikeshës së gruas së Hoxhës, u burgos përjetësisht në harresë. Për disa numra me radhë gazeta "Panorama" është duke publikuar dokumenta e dëshmi që ndriçojnë për herë të parë enigmat e ngjarjes makabre. Ndër më interesantet ndër to kanë qënë relacionet e kreut të sigurimit për rrethanat e arrestimit dhe vdekjes së Tafanit, kujtimet e nënës së vajzës fatkeqe dhe letrat e saj në adresë të Enver Hoxhës e Liri Belishovës si dhe një mori dëshmishë nga të njohur e bashkëkohës të shoqes së Nexhmijes. Pjesa në vijim sjellë rrëfimin rrënqethës të mbesës së Hatlije Tafanit që zbulon një histori sa të tmerrshme aq dhe mizore...