LSDM akuzon VMRO- DPMNE për shantazh ndaj BDI- së
Partia më e madhe opozitare në Maqedoni, Lidhja Socialdemokrate e Maqedonisë, ka akuzuar partinë e Nikolla Gruevskit, VMRO- DPMNE- në, se nëpërmjet mediave në Kosovë publikon materiale të përgjuara, me qëllim që të shantazhojë politikisht partnerin e saj të deritanishëm mes shqiptarëve, Bashkimin Demokratik për Integrim. Sipas LSDM- së të drejtuar nga Zoran Zaev, me materialet e reja që qarkullojnë në rrjetet sociale, VMRO- DPMNE synon diskreditimin e partisë së Ali Ahmetit, Bashkimit Demokratik për Integrim, të cilin e ka partner koalicioni prej mbi një dekade. LSDM ka kërkuar nga Prokuroria Speciale në Maqedoni që të sanksionojë përgjimin ilegal. Sipas “Express”, në materialet që së fundmi qarkullojnë në rrjetet sociale, janë disa biseda private dhe zyrtare mes funksionarëve të lartë të BDI-së. “Të gjitha materialet nga ‘ E vërteta për Maqedoninë’, që i posedonte LSDM- ja, janë në Prokurorinë Speciale Publike. Paralajmërojmë se porositësit e përgjimeve, Gruevski, Mijallkov ( ish- kreu i Shërbimeve Maqedonase të Inteligjencës) dhe bashkëpunëtorët e tyre do të përpiqen t’i shfrytëzojnë materialet që posedojnë për shantazh për qëllime të ndryshime dhe kjo tani dëshmohet me porositë që ia dërgojnë partnerit të koalicionit, Ali Ahmetit”, tha Petre Shilegov, nga LSDM- ja. Prej kohësh LSDM kishte në duar përgjimet e kryera nga Gruevski dhe i publikonte ato pak nga pak, duke paraqitur skandale korruptive dhe kontrolli të theksuar shtetëror.