Kremlini dënon akuzat për krime lufte: Të papranueshme
Kremlini ka dënuar retorikën e papranueshme nga Britania dhe Shtetet e Bashkuara në Këshillin e Sigurimit të OKB- së, pasi këto vende e akuzuan Rusinë dhe regjimin vendës për krime lufte në Siri. Zëdhënësi i Kremlinit, Dmitry Peskov, tha të hënën se: “Ne nënvizojmë tonin dhe retorikën në përgjithësi të papranueshme të përfaqësuesve të SHBA- ve dhe Mbretërisë së Bashkuar, që mund të dëmtojnë marrëdhëniet tona”.
Në takimin e Këshillit të Sigurimit, të dielën ambasadori britanik Matthew Rycroft ka akuzuar Sirinë dhe Rusinë për krime lufte. Ndërsa ambasadorja amerikane në OKB, Samantha Power, ka akuzuar Rusinë për “barbarizëm” gjatë diskutimeve të ndezura në Nju Jork, në zyrat qendrore të OKB- së, të dielën. Power tha se fushata e Rusisë në mbështetje të Bashar al- Assad nuk ishte antiterrorizëm, por barbarizëm. Ambasadori francez në OKB, Francios Delattre, tha gjithashtu se: “Krime lufte po kryhen në Alepo. Ata nuk duhet të kalojnë pa u ndëshkuar dhe pandëshkueshmëria nuk është një opsion në Siri”. Zyrtarët e lartë të OKB- së e kanë përshkruar ofensivën brutale të regjimit sirian kundër zonave të qytetit të rrethuar verior të Alepos si “barbare”. Sekretari i Përgjithshëm Ban Ki Moon tha të dielën se ai ishte “i tronditur” nga përshkallëzimi ushtarak në qytetin e rrethuar sirian dhe se përdorimi i bombave që shkatërrojnë bunkerët “sjell dhunën në thellësi të reja të barbarizmit”. Ban Ki Moon shtoi se goditjet ajrore, armët zjarrvënëse dhe bombat në zonat me popullsi të dendur, mund të përcaktohen si krime lufte. Ambasadori rus në OKB, Vitali Çurkin, tha se mbështetja e koalicionit të udhëhequr nga SHBA- të për rebelët ka penguar përpjekjet humanitare. “Situata humanitare në Aleppo mund të ishte normalizuar në gusht, por kjo nuk është bërë, nuk është lejuar për shkak se grupet e armatosura e kanë penguar këtë”, tha ai. Sekretari i jashtëm britanik, Boris Johnson, ka thënë se Rusia është fajtore në luftën siriane dhe po e bën atë “më shumë të shëmtuar”.