AKIP, letër Nishanit: Mos dekreto ligjin e mbetjeve FATION BINJAKU
Përfaqësuesit e shoqërisë civile: U miratua pa konsultime
Aleanca Kundër Importit të Mbetjeve në Shqipëri i ka bërë thirrje Presidentit të Republikës të mos e dekretojë ligjin “Për menaxhimin e integruar të mbetjeve”.
Përfaqësuesit e AKIP me anë të një letre zyrtare kanë theksuar se ligji u fut në seancë plenare me procedurë të përshpejtuar dhe në mungesë të plotë transparence. “I nderuar zoti President, ne si përfaqësues të AKIP Shqipëri, ju shprehim shqetësimin tonë të madh në lidhje me aprovimin më së fundmi të ndryshimeve në Ligjin Nr. 10 463, datë 22.09.2011 ‘ Për menaxhimin e integruar të mbetjeve’, ndryshime të cilat lejojnë importimin e mbetjeve nga vendet e huaja drejt Shqipërisë. Ky ligj u procedua me procedura të përshpejtuara, në mungesë totale informacioni, transparence dhe pjesëmarrje të qytetarëve shqiptarë”, thuhet në lerën e AKIP. Më tej, në letrën e shoqërisë civile theksohet se progres- raportet e viteve të fundit të Bashkimit Europian u kanë kushtuar vëmendje të veçantë problemeve të rënda mjedisore në Shqipëri. “Pikërisht në përgjigje të këtyre raporteve dhe aspiratave që ushqen shteti shqiptar për anëtarësimin në BE janë hartuar relacione ( Ministria e Mjedisit dhe Ministria e Integrimit), ku garantohet se aplikimi i: Konventës së Aarhusit, ligjit për të drejtën, e ligjit për njoftimin dhe konsultimin publik, ligjit për mbrojtjen e mjedisit, ligjit për vlerësimin e ndikimit në mjedis etj., i kanë garantuar qytetarët shqiptarë zbatimin e tri shtyllave që janë detyrim ligjor në fushën e mjedisit, këto tri shtylla janë: a) Aksesi në informacionin mjedisor. b) Akses në vendimmarrjen mjedisore c) Akses në drejtësi për çështje mjedisore”, thuhet në letrën drejtuar Presidentit. Për këto arsye, përfaqësuesit e AKIP i bënë thirrje kreut të shtetit se procedura ligjore është shkelur në mënyrë flagrante me ligjin e menaxhimit të integruar të mbetjeve. “Për këtë arsye, ju drejtohemi Ju si simbol i mbrojtjes së interesave kombëtare dhe konform kompetencave kushtetuese që Ju ushtroni, të mos dekretoni këto ndryshime dhe të verifikoni procedurat joligjore që janë ndjekur. Me besim dhe shpresë në vendimmarrjen tuaj qytetare”, thuhet në letrën e AKIP.