Duma: Qeveria ka dhënë koncesionin e parë për djegien e plehrave
Sekretarja për Marrëdhëniet me Publikun në PD, Grida Duma, ka denoncuar ato që, sipas saj, janë arsyet e vërteta që shtyjnë Kryeministrin Rama të kthejë ligjin e mbetjeve në Kuvend. “Akoma pa hyrë në fuqi ky ligj, qeveria ka vrapuar të hapë tenderin dhe të japë koncesionin e parë për djegien e mbetjeve. Skandali thellohet kur zbulohet se kompania që ka fituar tenderin është regjistruar për këtë shërbim 15 ditë pas shpalljes së tenderit”, deklaroi Duma. Sipas saj, tenderi për dhënien e koncesionit është hapur më 13 korrik të këtij viti. “Më datë 13.07.2016 është hapur tenderi për dhënien me koncesion të ndërtimit dhe administrimit të impiantit të trajtimit të mbetjeve urbane të qarkut Fier. Më datë 28.07. 2016, kompania fituese e tenderit ‘ Integrated Technology Services’ e regjistruar për aktivitet në fushën e teknologjisë së informacionit papritur shton në objektin e aktivitetit të saj edhe ndërtimin e impianteve të trajtimit të mbetjeve me djegie ( Incenerator) dhe landfille për përpunimin e mbetjeve urbane dhe të rrezikshme. Më 15.09.2016 njoftohet se një bashkim operatorësh ndërmjet kësaj kompanie shqiptare ‘ Integrated Technology Services’, me administrator dhe ortak të vetëm Klodian Zoto, e njohur si kompani IT dhe shoqërisë italiane ‘ Energy 2SRL’ e specializuar në ‘ green energy’, pa lidhje me riciklimin, kanë fituar garën për kontratën koncesionare me një afat 6- vjeçar”, sqaroi Duma. Për sekretaren për Marrëdhëniet me Publikun në PD, këto janë arsyet përse kreu i qeverisë anuloi referendumin dhe riktheu ligjin e mbetjeve.