Bylykbashi: Blerja e votës vepër korrupsioni, hetim nga SPAK
Partia Demokratike do të kërkojë rritje të politikës penale për shitblerjen e votës. Bashkëkryetari i Komisionit për Reformën Zgjedhore, Oerd Bylykbashi, ka deklaruar se këto fenomene duhet të bëjnë pjesë në veprat e korrupsionit. “Ne kërkojmë rritjen e politikës penale. Kush mund të jetë një instrument? Ajo që propozojmë ne është që dispozitat në Kodin Penal për shitblerjen e votës të detajohen më mirë, të rritet dënimi, por të kthehen në vepra korrupsioni. Është korrupsion dhe nga Prokuroria e zakonshme, t’i kalojë SPAK- ut, që ne mendojmë se do të bëjë një punë të fortë e shumë të mirë në luftën kundër korrupsionit”, ka deklaruar Bylykbashi.
Këto shqetësime, kreu i PD- së Basha i ndau në një takim në selinë blu me ambasadorin e SHBA- ve, Donald Lu dhe zv. ndihmëssekretarin amerikan të shtetit për Çështjet e Sundimit të Ligjit dhe Trafikut Ndërkombëtar të Narkotikëve, Aleksandër Arvizu. Gjatë takimit, Basha solli në vëmendje sasitë e mëdha të lëndëve narkotike që janë bllokuar nga partnerët ndërkombëtarë, teksa ka theksuar se droga po transportohet edhe nga ajri. “Partnerët kanë bllokuar deri tani në kufijtë e tyre sasi rekord droge të ardhura nga Shqipëria. Transporti i drogës po kryhet nga toka, ajri dhe deti, tha zoti Basha, duke sjellë në vëmendje trafikun me skafe dhe me avion. Rasti i fundit, ku për t’i shërbyer trafikut të drogës ishte ndërtuar edhe një pistë ajrore, tregon se trafiku me avion është një mënyrë e preferuar nga trafikantët”, theksoi Basha. Sipas kreut të PD- së, kthimi i Shqipërisë në hambar droge është pasojë direkte e kriminalizimit të politikës dhe administratës. Ndërkohë një tjetër shqetësim i ngritur nga kreu i PD- së ishte korrupsioni i paprecedentë. “Koncesione dhe tenderë që jepen pa garë dhe në fondet limit, duke injoruar ofertat më të ulëta, me përfitues vetëm një grusht njerëzish të lidhur miqësisht dhe politikisht me Edi Ramën”, tha Basha, duke sjellë në vëmendje rastin e Dibrës.
TAKIMI Lidhur me çështjen e zgjedhjeve të ardhshme, Basha foli edhe në një takim të zhvilluar me strukturat e PD- së në qytetin e Fierit. Sipas tij, opozi- ta nuk do të zgjedhë t’i përgjigjet pushtetit të bandave me banda, por do të krijojë një aleancë të gjerë me qytetarët. “Pyetja që shtrohet është kjo: Po mirë, kur këta kanë paratë e tenderëve e të korrupsionit, kur këta kanë paratë e drogës që e kanë mbushur si asnjëherë vendin me të, si do t’ia dilni të përballeni dhe të fitoni?! Cila është përgjigjja? Cilët janë skenarët? Të bëjmë bandën tonë, ushtrinë tonë të gangsterëve për t’u përballur me ushtrinë e tyre? Absolutisht nuk ka qenë dhe nuk mund të jetë kurrë zgjidhje e demokratëve. Forca jonë, forca e opozitës është qytetari shqiptar”, sqaroi Basha. Kreu i PD- së do të vijojë takimet me strukturat në të gjithë vendin ditët e ardhshme.