Vëzhguesit vendorë për Dibrën: Blerja e votës me trajektore rritëse
Zgjedhjet e pjesshme në Bashkinë e Dibrës, sipas Koalicionit të Vëzhguesve Vendorë, nuk i përmbushën standardet demokrate të cilat aspiron Shqipëria. Në këtë konkluzion kanë dalë dje në raportin final monitoruesit e zgjedhjeve të pjesshme në Dibër. Në raportin e publikuar dje, KVV ka theksuar se: “Zgjedhjet e pjesshme për kryetar të Bashkisë Dibër ishin një proces zgjedhor i radhës, por nuk ishin pjesë e një përvoje të standardeve dhe aspiratave demokratike të një niveli të tillë që qytetarët shqiptarë meritojnë, apo që stadi aktual i aspiratave integruese dhe ndërtimit të shtetit ligjor kërkojnë”. Në raport është trajtuar dhe fenomeni i blerjes së votave, por vihet theksi në mungesën e reagimit të institucioneve shtetërore. “Në trajektoren rritëse të akuzave për forma të drejtimit dhe të blerjes së votës, ku janë përfshirë proceset zgjedhore në vend, ishte dhe procesi zgjedhor i Bashkisë Dibër. Reagimi institucional nga Komisioni Qendror i Zgjedhjeve, si mbikëqyrës i procesit zgjedhor, Prokurorisë së Përgjithshme dhe Policisë së Shtetit si organe të hetimi, ishin tejet të ulëta. Qëndrimet publike të këtyre institucioneve munguan dhe, për sa u arrit të bëhej e ditur, investimi i tyre ka qenë minimal. Institucionet përgjegjëse qëndruan pasive, jo efektive në kohë dhe jo në lartësinë e përgjegjësive që mbartin, çka bëri që kjo përvojë ta thellojë instrumentalizimin e akuzës si mjet të ligjërimit politik dhe jo si mekanizëm hetues të sistemit të drejtësisë”, thuhet në raportin e KVV. Për të luftuar fenomenin e blerjes së votës, Koalicioni i Vëzhguesve Vendorë u ka bërë thirrje ligjvënësve të krijojnë një strukturë të posaçme në Prokurorinë e Përgjithshme për të luftuar korrupsionin zgjedhor. “Sugjerohet ngritja e një strukture të specializuar si pjesë e Prokurorisë së Përgjithshme me objekt: “hetimin dhe ndjekjen e formave të korrupsionit zgjedhor”, thekson raporti i KVV. Më tej, vëzhguesit vendorë kanë ngritur si shqetësim mosrealizimin e Reformës Zgjedhore, duke thënë se procesi i Dibrës është një paralajmërim për zgjedhjet e 2017- s. “Procesi zgjedhor për kryetar të Bashkisë Dibër mund të shihet edhe si një test në miniaturë për zhvillimin e procesit zgjedhor të vitit 2017, si dhe një rikujtesë për vëmendje ndaj Reformës Zgjedhore, për problematikat që mbartin zgjedhjet në vend. Ky proces, në rezultanten e tij, testoi dhe rikujtoi gjendjen e zbatueshmërisë së ligjit dhe të procedurave nga administrata publike”, thekson raporti.