BB: Shqipëria vazhdon me rritjen, por pagat kanë rënë
“Zgjedhjet e pasiguria politike, rreziqe në rritje për ekonominë”
Banka Botërore prezantoi dje vlerësimet për ecurinë ekonomike, duke parashikuar se rritja ekonomike në 2016 pritet të jetë 3,2 për qind, krahasuar me 2,8 për qind që ishte në 2015.
Banka Botërore vë në dukje se ky përshpejtim i rritjes ekonomike po ndihmon në përmirësimin e punësimit dhe papunësia ka shënuar rënie. Por, pavarësisht se punësimi ka shënuar rritje, Banka Botërore konstaton se pagat kanë pësuar rënie për të tretin 3- mujor radhazi. “Papunësia ra me 15,5 për qind apo 0,7 për qind më e ulët se në të njëjtin tremujor të 2015. Pavarësisht rritjes në punësim, duket se pagat reale kanë pësuar rënie për të tretin tremujor radhazi”, thuhet në raport. Banka Botërore mbështeti ligjin e qeverisë për faljen e gjobave dhe kamatëvonesave të biznesit, duke u shprehur se nga vlerësimit e bërë amnistia nuk jep ndikim negativ të buxhet.
PAGAT Ekonomistja e Bankës Botërore, Hilda Shijaku, shpjegoi se rënia e pagave në një kohë kur punësimi është rritur ka ardhur për shkak se punësimi nuk ofrohet nga sektorët tradicionale dhe punësimin më të lartë e kanë të rinjtë të paguar me paga të ulëta. “Kjo ndodh sepse sektorët që kanë ofruar punësim kanë qenë të ndryshëm nga ata që kanë qenë tradicionalë apo grupmoshat që i janë ofruar tregut të punës kanë qenë grupmosha të reja që ndoshta kanë pasur dhe paga më të ulëta. Por më duhet të specifikoj se rezultatet e anketës tremujore të biznesit tregojnë se numri i të punësuarve është rritur me 10 për qind në vit, ndërkohë që fondi i pagave është rritur 5 për qind, prandaj arrijmë në konkluzion që paga mesatare mund të ketë pësuar rënie”, u shpreh Shijaku. Për rritjen e pagave dhe pensioneve vitin e ardhshëm, Banka Botërore tha se qeveria duhet të mbështet te rritja e të ardhurave dhe ulja e shpenzimeve, në mënyrë që të mos rritet borxhi. “Qeveria ka premtuar që do të vijojë konsolidimin fiskal në vitin 2017 dhe për të bërë të mundur rritjen e pagave dhe të pensioneve pa prekur trajektoren rënëse të borxhit i duhet të marrë masat korresponduese, ose në krahun e të ardhurave, ose të rishikojë shpenzimet për kategori të tjera”, u shpreh Shijaku. ZGJEDHJET Banka Botërore parashikon që rritja e qën- drueshme ekonomike pritet të vijojë deri në vitin 2018, por pavarësisht kësaj rimëkëmbja përballet me rreziqe në rritje. Si rreziqe të brendshme Banka Botërore adreson zgjedhjet dhe pasigurinë politike, edhe pse mendon se cikli i ri ofron mundësi për progres. Ndërsa si rreziqe të jashtme, Banka Botërore adreson dobësinë e vazhdueshme të Greqisë dhe tensionet politike në Turqi. Rritjen ekonomike në nivelin 3,2 për qind për 2016, sipas Bankës Botërore është e mbështetur nga TAP- ja dhe veprat e tjera energjetike. Për këtë vit sipas Bankës Botërore, investimet e huaja kanë shënuar rënie, ndërsa borxhi ka arritur 72,5 për qind duke pësuar rënie. Përfaqësuesja e Bankës Botërore në Tiranë, Tahseen Sayed, theksoi se rritje ekonomike e qëndrueshme përballë rreziqeve të shtuara të situatës mund të arrihet vetëm me reforma këmbëngulëse dhe me përmirësimin e klimës së biznesit. “Nga ana e qeverisë ka pasur përpjekje dhe reformat po ecin përpara, por mbetet shumë për të bërë. E vetmja fjalë që mund t’ju them është se vendi duhet të ketë një mjedis biznesi nga më të mirët në botë, sepse kështu do të kishte ndikim pozitiv”, u shpreh Sayed.