Rama: Qeveria s’tradhton interesat publike, biznesi partner në vendime
Shkëmbimi i ideve në analizimin e investimeve gjermane ishte tema kryesore e punimeve të djeshme të Forumit Ekonomik Gjermani- Shqipëri me prezencën e Kryeministrit Edi Rama dhe të ftuarit special, ishkancelarit gjerman Schröder. Në punimet e Forumit Ekonomik, Kryeministri Rama e vlerësoi si mjaft të rëndësishme në përmirësimin e klimës së biznesit shkurtimin e procedurave për regjistrimin e pronës, të lejeve të ndërtimit dhe regjistrimit të biznesit. Kryeministri Rama deklaroi se pavarësisht këtyre reformave, qeveria ka ende për të bërë për përmirësimin e klimës së biznesit, ndërsa tha se sipërmarrësit janë partnerë dhe jo kundërshtarë. “Pa dyshim ka ende shumë për të bërë, por të paktën kemi një qeveri që nuk tradhton interesat publike dhe, mbi të gjitha, ka krijuar një kon- tekst tërësisht të ri marrëdhëniesh me sipërmarrjen. Sipërmarrja nuk shihet as si kundërshtare e interesave të publikut, as si kërcënim për sistemin e mbrojtjes shoqërore, as si lopë që duhet vetëm mjelë, pa u kujdesuar se si ushqehet dhe ku ushqehet. Sot, sipërmarrja është një partner në çdo tryezë dhe vendimmarrjet që e ndikojnë sipërmarrjen burojnë nga ky partnership. Por, për një gjë jemi të qetë, që, nëse gjenerata e atyre që lindën me rënien e Murit të Berlinit dhe me shemb- jen e diktaturës në Shqipëri humbi pjesën themelore të jetës për të marrë arsimimin e duhur dhe humbi shumë shanse për shkak të mosreformimit të sistemit në çdo sektor, gjenerata tjetër nuk do të jetë një tjetër gjeneratë e humbur, por do të jetë një gjeneratë që do të përfitojë frytet, jo vetëm të këtyre reformave, por të të gjitha të mirave që rruga e reformave sot do t’i bëjë të mundura nesër”, u shpreh Kryeminis- tri Rama. Edhe ministrja e Ekonomisë, Milva Ekonomi, vlerësoi kontributin e biznesit gjerman për rritjen ekonomike. “Bashkëpunimi me Gjermaninë, pa dyshim, që është një bashkëpunim shumë i rëndësishëm dhe zë një dimension të madh në gjithë politikën tonë të jashtme të anëtarësimit të Shqipërisë në familjen europiane. Me Gjermaninë kemi një bashkëpunim shumëvjeçar dhe kemi besuar gjithmonë te përkrahja dhe mbështetja e këtij vendi mik. Sot në Shqipëri operojnë rreth 170 kompani gjermane. Gjermania ka dhënë një kontribut të rëndësishëm edhe në investimet e huaja direkte në Shqipëri. Investimet e huaja direkte gjermane janë rreth 128 milionë euro në Shqipëri, ndërkohë që vëllimi tregtar me Gjermaninë ka ardhur vazhdimisht në rritje”, u shpreh Ekonomi.