Dënimi për "vjedhje", Ksera apelon vendimin e Gjykatës
TIRANE - Ish- ministri i Punës dhe Çështjeve Sociale, Spiro Ksera, apelon vendimin e Gjykatës së Tiranës së datës 15 shtator 2016 ndaj tij. Ishministri u dënua me 1 vit e 8 muaj burg për "vjedhje duke shpërdoruar detyrën", si edhe iu hoq e drejta e ushtrimit të funksioneve publike për 5 vjet. I pandehuri Ksera, i cili qëndron i izoluar nga 29 janari 2016, ka depozituar ankim ndaj këtij vendimi, duke këmbëngulur në pafajësinë e tij. Ankimi është depozituar nga mbrojtësit e Kserës në Apel pak ditë më parë. Burime pranë Gjykatës konfirmuan se në ankim ish- ministri pretendon se vendimi i Shkallës së Parë është dhënë në zbatim të gabuar të ligjit dhe si i tillë duhet prishur. Ankim për të njëjtin vendim kanë depozituar edhe tre ish- vartësit e Kserës, Artevis Mene, Edla Kozaj dhe Elisabeta Dodbiba, të bashkëpandehur në të njëjtin proces gjyqësor. Të tre këta të pandehur e konsiderojnë të gabuar vendimin e Shkallës së Parë. Çështja pritet të hidhet në short, i cili do të përzgjedhë treshen gjykuese të kësaj dosjeje në Apel. Katër ish- zyrtarët e Ministrisë së Punës dhe Çështjeve Sociale u përballën në Gjykatën e Tiranës me akuzat e "vjedhjes duke shpërdoruar detyrën", si edhe "falsifikim të dokumenteve". Ata u gjetën përgjegjës nga gjyka- ta në abuzimin e konsumuar gjatë zhvillimit të disa aktiviteteve fiktive në këtë ministri, për të cilat janë lëvruar gati 30 milionë lekë nga buxheti i ministrisë. Gjykata e Tiranës arsyetonte në vendim se gjashtë aktivitetet e planifikuara për shtresat në nevojë nuk kanë ngjarë aspak sipas planifikimit, pasi nuk janë zhvilluar fare. Nga ana tjetër, dosjet përshkruese të këtyre aktiviteteve janë mbushur me dokumente fiktive, foto të manipuluara, si edhe video që u përkasin aktiviteteve të tjera. Gjykata ka konstatuar shpenzime të konsiderueshme për këto aktivitete, për të cilat nuk ka pasur fatura justifikuese në dosje. Sipas gjykatës, shkelje janë vërejtur që në përzgjedhjen e fituesve të tenderit 25 milionë lekë për organizimin e aktiviteteve nga një bashkim kompanish, që nuk përmbushnin kriteret dhe në vijim, gjatë zhvillimit të aktiviteteve. Tre ish- vartësit e Kserës, të pandehurit Mene, Kozaj dhe Dodbiba, u dënuan me nga 10 muaj burg për akuzën e "falsifikimit". Për të pandehurit Kozaj dhe Dodbi- ba gjykata vendosi pezullim të dënimit me burg dhe lënien e tyre në liri me kusht për një afat 2- vjeçar.