Dy tatimorë në pranga, kërkuan ryshfet
TIRANE - Dy punonjës të Drejtorisë Rajonale të Tatimeve të Tiranës janë arrestuar dje nga oficerët e Antikorrupsionit, pasi u denoncuan publikisht nga pronari i një thertoreje, që u kishte dhënë ryshfet për të mos i vendosur gjobë. Burime zyrtare të Policisë së kryeqytetit thanë se, në bashkëpunim me Njësinë Task- Forcë të Prokurorisë, bazuar në pamjet e transmetuara në emisionin investigativ "Fiks Fare", u krye ndalimi i dy punonjësve të Tatimeve. Të arrestuarit janë Albert Cako, 43 vjeç, me detyrë inspektor në Drejtorinë Rajonale të Tatimeve dhe Anxhelo Sida, 29 vjeç, me detyrë specialist në këtë Drejtori. Sipas Policisë, nga hetimet e kryera, ka rezultuar se këta shtetas i kanë kërkuar dhe marrë shumën prej 20 mijë lekësh të rinj shtetasit R. R., në këmbim të mosvendosjes së masës administrative dhe mbylljes së aktivitetit. Gjithashtu, në kuadër të këtij hetimi është bërë shpallja në kërkim e shtetasit S. K. dhe është proceduar në gjendje të lirë shtetasja M. K., për veprën penale "shpërdorim detyre". Por edhe pronari i thertores që denoncoi ryshfetin në televizion, është proceduar në gjendje të lirë për veprën penale të "korrupsionit aktiv ndaj personave që ushtrojnë funksione publike". "Fiks Fare" i është rikthyer mbrëmjen e së hënës korrupsionit në administratën shtetërore, ku denoncoi me zë dhe figurë një inspektor tatimor, i cili ushtron presion ndaj tregtarëve, me qëllim për të përfituar ryshfet. Gjatë emisionit u denoncua historia e një pronari thertoreje në zonën e Institutit Bujqësor në Tiranë, i cili rrëfeu se inspektorët e kontrollit tatimor në kryeqytet e kishin kërcënuar me gjoba të larta, me qëllim që ai të jepte para nën dorë. Sipas tij, inspektorët i kishin kërkuar 20 mijë lekë të rinj për ta falur, pra 10 për qind të shumës së gjobës, që ishte 200 mijë lekë të rinj. Ai ka treguar se brenda 3 vitesh, aktiviteti i tij është mbyllur tri herë.