Ja çfarë mendojnë Clinton e Trump për zhvillimin, sigurinë dhe orientimin

Dy kandidatët presidencialë përplasen për punësimin, taksat, sigurinë, aleancat dhe këndvështrimet për njëri- tjetrin

Hillary Clinton dhe Donald Trump mbajtën debatin e parë televiziv presidencial të hënën në mbrëmje në Universitetin “Hofstra” në Hempstead, Nju Jork. Debati u moderua nga Lester Holt i “NBC News” dhe u mbajt në një kohë kur sondazhet kanë treguar se të dy kandidatët potencialë janë pothuajse barabar me mbështetjen e votuesve. Debati u sponsorizua nga Komisioni mbi Debatet Presidenciale, një organizatë jopartiake dhe jofitimprurëse. Formati i debatit u krijua nga ky komision dhe të dy fushatat e kandidatëve presidencialë kanë rënë dakord që t’i përmbushin rregullat. Debati zgjati 90 minuta dhe ishte ndarë në gjashtë segmente, secili nga 15 minuta. Temat kryesore të diskutimit ishin prosperiteti, orientimi dhe siguria e Amerikës. Për çdo pyetje të moderatorit, kandidatët kishin dy minuta kohë për t’u përgjigjur deri në segmen- tin e fundit, ku u mbajt edhe një diskutim i hapur. Gjatë debatit, audienca në sallë ka qëndruar në heshtje, por kanë duartrokitur herë pas here. I vetmi moment ku audienca ka thyer rregullin për të qëndruar në heshtje dhe kanë qeshur fort, ishte kur Trump tha se pika e tij e fortë është temperamenti i tij. Debati i parë u fitua nga Hillary Clinton, e cila ishte dukshëm më e përgatitur se Trump, duke dominuar në pjesën më të madhe të temave. Kandidatët do të përballen edhe dy herë të tjera në debate televizive, deri kur të mbahen zgjedhjet presidenciale, më 8 nëntor. Debati i ardhshëm presidencial do të jetë më 9 tetor në Washington University në St. Louis dhe i fundit më 19 tetor, në Universitetin “Nevada” në Las Vegas. Debati i zëvendëspresidentëve mbahet më 4 tetor në Universitetin “Longwood” në Farmville, Virginia.