I hoqën kempin, burri në depresion masakron me çifte gruan e kunatën
Pas debatit qëllon për vdekje bashkëshorten, plagos kunatën
Një burrë me problem nervore vrau mbrëmë gruan e tij në Ndroq dhe plagosi kunatën.
Ngjarja e rëndë ndodhi rreth orës 19: 30, kur shtetasi Kasëm Lila, 56 vjeç, ka qëlluar me çifte në drejtim të gruas së tij duke e lënë të vdekur në vend. Shtetas Afize Lila, 47 vjeçe, ka humbur jetën rrugës për në spital nga plagët e shumta të marra në trup prej saçmave të çiftes. Ndërkohë në vendin e ngjarjes ka mbetur e plagosur edhe kunata e autorit të krimit, shtetasja Zyra Lila, 40 vjeçe. Ngjarja e rëndë ka ndodhur në një moment nervozizmi të shtetasit Kasëm Lila, banues në fshatin Çoçaj të Ndroqit. Fillimisht policia raportoi se viktimë kishte mbetur kunata e autorit dhe plagosur ishte gruaja e tij, por rreth dy orë pas krimit, gjithçka u sqarua. Policia tha zyrtarisht se viktimë kishte mbetur shtetasja Afize Lila, gruaja e Kasëm Lilës, ndërsa ishte plagosur kunata e 56-vjeçarit shtetasja Zyra Lila. Ngjarja ka ndodhur në një konflikt të mo- mentit mes bashkëshortëve, ku shtetasi Kasëm Lila ka marrë çiften që kishte në shtëpi dhe e ka drejtuar mbi gruan e tij. Në këtë situatë ka ndërhyrë kunata e autorit të ngjarjes, shtetasja Zyra Lila, e cila në momentin e të shtënës me çifte nga 56-vjeçari ka qenë fare pranë dhe ka mbetur e plagosur nga saçmat. Ndërkohë, e shoqja e Kasëm Lilës, Afizeja, ka mbetur e plagosur rëndë dhe ka vdekur rrugës për në spital. Policia dhe mjekët e spitalit të Traumës thanë mbrëmë se 40- vjeçarja iu nënshtrua ndërhyrjes kirurgjikale dhe është jashtë rrezikut për jetën. MOTIVI I NGJARJES Banorë të zonës, por edhe policia, tregonin mbrëmë se krimi në familjen Lila në Ndroq ndodhi si pasojë e konflikteve mes bashkëshortëve. Por, komshinjtë e Kasëm Lilës e përshkruanin atë mbrëmë si një njeri të qetë dhe joproblematik. Sipas tyre, gjendja e 56- vjeçarit ishte përkeqësuar në 3- 4 javët e fundit. Nga ana tjetër, Policia e Tiranës bëri me dije se pak vite me parë Kasëm Lila kishte vuajtur nga një sëmundje tumorale në kokë. Si pasojë e kësaj sëmundjeje, ai kishte kryer një ndërhyrje kirurgjikale në kokë, e cila e kishte bërë të paaftë për punë. Nisur nga ky fakt, atij shteti i kishte vendosur një ndihmë financiare invaliditeti e cila, sipas dëshmitarëve në fshatin ku ndodhi krimi, ishte ndërprerë muajin e fundit. Ky fakt, sipas dëshmitarëve në zonën ku ndodhi krimi, e kishte acaruar tej mase gjendjen e 56vjeçarit Kasëm Lila. Për këtë arsye të afërmit e vizitonin vazhdimisht familjen Lila javët e fundit. Policia bëri me dije ndërkohë se autori i krimit në familje vuante nga probleme nervore si pasojë e sëmundjes që kishte kaluar.
ARRESTIMI Menjëherë pas vrasjes së gruas dhe plagosjes së kunatës, Kasëm Lila ka dalë mbrëmë nga banesa dhe e ka hedhur armën në oborr. Ai mësohet se nuk ka bërë asnjë rezistencë në momentin kur efektivët e policisë mbërritën dhe i vunë prangat në duar. Hetuesit sekuestruan edhe armën e krimit në vendin e ngjarjes, në cilësinë e provës materiale. Mësohet se 56vjeçari e ka pranuar ngjarjen mbrëmë në polici, duke thënë se kishte humbur kontrollin.