Dhori Kule: Problemet me regjistrimet, jo të Ministrisë, 340 kuota bosh
"Vijojmë bashkëpunimin me ' Luarasin', është e mirë publike"
Rrëmuja e krijuar këtë vit me pranimet në universitete është pasojë e mosmenaxhimit të situatës nga këto të fundit.
Këtë e thotë dekani i Fakultetit të Ekonomisë, Dhori Kule, në një intervistë për rubrikën "Opinion" në "News 24". "Pranimet këtë vit janë bërë ashtu si në të gjitha vendet e botës, nga universitetet. Barrën e akuzave e ka mbajtur Ministria e Arsimit në masën më të madhe, në vlerësimin tim padrejtësisht, sepse ligji autorizon universitetet për t'i bërë këto punë. Janë universitetet që nuk kanë kryer detyrën ligjore", vë në dukje ish- rektori i Universitetit të Tiranës. Kule merr përsipër përgjegjësinë, duke premtuar që kaosi i krijuar këtë vit me pranimet në Fakultetin e Ekonomisë do të rregullohet vitin e ardhshëm. "Pas raundit të parë, shumë maturantë nga paniku mund të kenë marrë vendime të përshpejtuara, që mendoj se nuk i kanë pasur preferenca të para. Edhe për këtë unë kam menduar një zgjidhje vitin tjetër. Ne kemi hapësirat dhe kompetencat të bëjmë transferime, të shtojmë kuotat për t'i rimarrë". Referuar maturantëve të pakënaqur, Kule sqaron se bëhet fjalë për ata që janë më kërkues dhe me pikë të larta, dhe jo maturantët që nuk shpalleshin dot fitues as në këtë fazë. Në "Opinion", dekani i Ekonomikut foli edhe për lidhjet me universitetet e tjera, veçanërisht me "Luarasin", me të cilin e lidh tashmë jo vetëm fusha e Ekonomisë, por edhe afërsia gjeografike dhe drejtimi. "Bashkëpunimi me ' Luarasin' në degët e Ekonomisë dhe Jurisprudencës do të konsolidohet në vazhdimësi, duke shkëmbyer sinergji pozitive. Pedagogët tanë do të japin mësim aty dhe anasjelltas. Ne kemi lidhje me të gjitha universitetet. Me ' Luarasin' tashmë kemi një lidhje të veçantë, sepse drejtohet tashmë nga ish- profesori i Ekonomikut për një kohë të gjatë, prof. Arben Malaj, si dhe për shkak të afërsisë me fakultetin". Për Kulen, "Luarasi" ka krijuar figurën e tij në tregun e arsimit të lartë, është një e mirë publike dhe si e tillë duhet funksionojë.
GARA TEK EKONOMIKU
Nga sot nisin regjistrimet për fazën e pestë të raundit të dytë të pranimeve për kuotat që ende janë të parealizuara. Në Fakultetin e Ekonomisë kanë mbetur 339 vende të lira: 72 në degën Financë, 143 në Administrim Biznes, 54 në Informatikë Ekonomike dhe 70 në degën e Ekonomiksit. Në përpjekje për të gjetur një zgjidhje për maturantët e mirë që ende nuk kanë vendosur, dekani i qëndron ende idesë së tij për të pranuar më të mirët përtej kuotave dhe afateve të përcaktuara. "Tashmë situata po shkon drejt zgjidhjes, ne na kanë mbetur mbi 300 studentë për të marrë. Në datën 27 mbyllet procesi dhe nis viti akademik për të gjithë. Por, edhe në qoftë se ngelen kuota të parealizuara, do të vazhdojmë të marrim maturantët që janë në pritje". Në faqen zyrtare të Fakultetit Ekonomik është botuar lista me emrat fitues të fazës së pestë të raundit të dytë, të cilët mund të regjistrohen sot dhe nesër. Në rast se nuk e bëjnë, humbasin të drejtën e studimit në degën e shpallur fitues.