Duka refuzon ftesën e PS: Jam në koalicion me PD- në
Balla: PAA duhet të vijë me ne, vendi juaj s’është mes humbësve
Partia Agrare Ambientaliste e drejtuar nga Agron Duka ka marrë dje ofertë nga socialistët për të qenë pjesë e koalicionit të tyre, edhe pse sot është e rreshtuar me koalicionin opozitar.
Në Konventën Kombëtare të zhvilluar dje në Tiranë, në fjalën e tij përshëndetëse, nënkryetari i Grupit Parlamentar socialist, Taulant Balla, i kërkoi PAA- së të rreshtohet me koalicionin qeverisës.
“Kam kënaqësinë të përshëndes Kongresin e kësaj partie, me bindjen që ky është kongresi i fundit që e gjen Partinë Agrare Ambientaliste në koalicion me Partinë Demokratike. Sepse kam bindjen që miku ynë, Agron Duka, ministër Bujqësie në qeverinë e Partisë Socialiste dhe ish- deputet i saj, e ka marrë lidershipin e kësaj partie duke respektuar pjesën më të mirë të historisë së saj, kur kjo PAA ishte një aleate besnike e Partisë Socialiste. Di vetëm t’ju them se edhe ju të Partisë Agrare Ambientaliste, duhet të vini me ne një orë e më parë që ne të punojmë edhe me ju edhe më shumë për njerëzit e për komunitetet e Shqipërisë sonë.
Vendi juaj dhe i Agron Dukës nuk është mes humbësve, por në krah të fitimtarëve: Në Aleancën për Shqipërinë Europiane!”, tha Balla duke përshëndetur Konventën e Agrarëve. Por kreu i kësaj partie, Agron Duka, iu përgjigj qartë socialistëve se ka një partneritet luajal me Partinë Demokratike. “Ju jeni në dijeni të sfidës së parë që PAA ka marrë përsipër. Kjo do të jetë provë e një partneriteti luajal brenda opozitës, së cilës kam kënaqësinë t’i shpreh edhe në emrin tuaj falenderimet për kryetarin e PD- së, Lulzim Basha”, deklaroi Duka. KOLONJA Edhe zgjedhjet për kreun e Bashkisë së Kolonjës kanë qenë pjesë e replikave mes Ballës dhe Dukës dje në Konventë. Kam bindjen se, edhe fshehja e Saliut dhe e Lulit pas Agronit në garën për Kolonjën, është rezultat i të njëjtit fakt, që kjo parti vjen nga e majta dhe u kujton të majtëve historinë e tyre të përbashkët.
Ju jeni aktualisht në një garë lokale me ne dhe unë s’mund të bëj këtu kurrësesi fushatë për ju, po natyrisht as fushatë për ne!”, tha Balla. Madje ai kishte dhe një mesazh për PAA- në për garën e Kolonjës. “Kam kënaqësinë t’ju përcjell përshëndetjet e kryetarit tonë Edi Rama, i cili me porositi t’ju them se në Kolonjë do t’ju mundim për t’i dhënë Partisë Demokratike mesazhin e qartë se me ne nuk ka shans të fitojë as në Dibër, as në Kolonjë dhe as në Shqipëri! Por ju, agraro- ambientalistët s’duhet të na e merrni për keq, sepse humbja do jetë e PD- së, aspak e juaja. Do të jetë humbja e radhës në krah të PDsë, por këtë humbje në Kolonjë ju lutem shikojeni si një lehtësim, sepse ju duhet të rreshtoheni me ne fituesit”, tha Balla. Nga ana e tij, kreu i PAA- së, Agron Duka, e pati një përgjigje. “Ky besim i koalicionit opozitar shpreh peshën e madhe dhe specifike, gjithnjë e në rritje, të Partisë Agrare Ambientaliste si brenda koalicionit, ashtu edhe më gjerë, në arenën politike shqiptare. Ky besim do të thotë angazhim maksimal, për të dëshmuar aftësinë dhe forcën tonë. Uroj fitore, për kandidatin tonë të përbashkët, z. Dritan Hajro!”, u shpreh kreu i PAA- së, Agron Duka. Kreu i PAA- së prezantoi para simpatizantëve, por edhe paraardhësit të tij Lufter Xhuveli, disa nga pikat kyçe të programit të tij elektoral, që ka në fokus bujqësinë dhe varfërinë, ndërsa fjalimin e mbylli me një mesazh për shqiptarët: “Sot vlen më shumë se kurrë thirrja ‘ Mos ik, ti vlen për vendin tënd, Shqipëria është e jona!’”, tha Duka.