Mesila Doda, ish- deputetja e PD, zgjidhet sekretare e Përgjithshme e PDIU- së
Këshilli Kombëtar i Partisë Drejtësi, Integrim dhe Unitet ka zgjedhur drejtuesit e sekretariateve, nënkryetarët dhe sekretarin e Përgjithshëm të partisë. Më votën e anëtarëve të Këshillit Kombëtar, sekretare e Përgjithshme është zgjedhur deputetja Mesila Doda. Deputetja e larguar disa muaj më parë nga Partia Demokratike është emëruar në një prej posteve më të rëndësishme të PDIU- së. Doda së bashku më kryetarin e PDIU-së ka qenë bashkëpropozuese e disa prej nismave më të rëndësishme të kësaj force politike, si nisma për rezolutën çame dhe projektligji për hapjen e dosjeve të komunizmit. Po dje Këshilli Kombëtar i PDIU- së ka zgjedhur dy nënkryetarët e ri të kësaj force. Nënkryetar është votuar Halil Hyseni, aktualisht në postin e zëvendësministrit të Jashtëm, po ashtu në postin e dytë të nënkryetarit është zgjedhur kryetari aktual i Shoqatës Çamëria, Abaz Hado, ku zgjedha e tij është bërë në bazë të marrëveshjes mes kësaj partie dhe shoqatës në fjalë. Dje strukturat e PDIU- së votuan dhe për postin e sekretar organizativ, ku u zgjodh Alfred Deshati, i cili në muajin prill u largua nga Partia Republikane. Alfred Deshati ka qenë në postin e nënkryetarit të Partisë Republikane për disa vite. Ai së fundmi iu bashkua Partisë Drejtësi, Integrim dhe Unitet, dhe është zgjedhur dje si sekretar organizativ i kësaj partie. PDIU votoi dje dhe për postin e sekretarit për çështjet zgjedhore, duke ia besuar këtë detyrë Erion Manohasajt. Nga ana tjetër, Alda Hasani u zgjodh sekretare për organizatat partnere.