Zgjedhjet, Rama mbledh në Gjirokastër ministrat e PS
Analiza e sektorëve dhe strategjia për zgjedhjet e ardhshme
Kryeministri Rama ka mbledhur në Gjirokastër ministrat e Partisë Socialiste me të cilët për rreth 5 orë ka diskutuar për punën e çdo sektori.
Analiza e punës së çdo ministrie që drejtohet nga të mandatuarit e Partisë Socialiste mësohet se ka pasur si qëllim përgatitjen e një platforme të diskutuar që tani për fushatën zgjedhore të vitit 2017. Të pranishëm në këtë takim informal kanë qenë ministri i Brendshëm Saimir Tahiri, ministrja e Arsimit Lindita Nikolla, ministri i Financave Arben Ahmetaj, ministrja e Ekonomisë Milva Ekonomi, ministrja e Inovacionit Milena Harito, ministri i Jashtëm Ditmir Bushati, ministri i Shëndetësisë Ilir Beqaj, ministrja e Mbrojtjes Mimi Kodheli, ministri për Pushtetin Vendor Bledi Çuçi, ministrja për Marrëdhëniet me Parlamentin Ermonela Felaj, por dhe sekretarë të Kryesisë së PS- së dhe Kryesia e Grupit Parlamentar. Takimi që ka nisur në orën 17: 00 ka përfunduar rreth orës 22: 00 e më pas, të gjithë bashkë kanë vijuar për darkë në hotel “Çajupi” të Gjirokastrës. Për takimin është treguar kujdes që ai të ishte sa më larg syrit të mediave. Kreu i Qeverisë, bashkë me ministrat dhe anëtarët e Kryesisë dhe Grupit Parlamentar kanë ballafaquar premtimet elektorale të bëra gjatë fushatës së vitit 2013, kur socialistët fituan zgjedhjet dhe arritjet e deritanishme. Mësohet se kreu i Qeverisë ka kërkuar nga pjesëmarrësit në këtë takim që të shihet mundësia e realizimit të atyre premtimeve të parealizuara akoma në këto tre vjet të drejtimit të vendit, duke i cilësuar ato si më emergjentet. Burime nga takimi thanë për “Panoramën” se është kërkuar gjithashtu rakordimi më i mirë me shifrat që deklarohen nga anëtarë të kabinetit qeveritar. Të pranishmit në këtë takim informal të Kryeministrit me anëtarë të kabinetit të tij kanë diskutuar dhe ndaj masave drastike që qeveria është detyruar të marrë për të rivendosur ligjin dhe zbatueshmërinë e tij. Mësohet se për periudhën e mbetur deri në zgjedhje, të bëhet kujdes me gjobat, si ndaj qytetarëve, ashtu dhe nga bizneseve, sidomos kur bëhet fjalë për kategori të caktuara sociale dhe profesionale. Mësohet se në këtë takim nuk është folur për koalicionin e ardhshëm zgjedhor, duke pritur vendimin e LSI- së, me të cilën ende nuk është folur në nivel kryetarësh. MINISTRA