Bodrume për tharje droge, zbulohet 1 ton në një ditë
Operacionet antikanabis, bimët bllokohen gjatë përpunimit
Brenda një dite, policia bllokon 1 ton drogë në proces tharjeje. Operacioni i nisur të premten vazhdoi edhe ditën e djeshme, duke arritur të zbulohen sasi të tjera të konsiderueshme lënde narkotike.
Tashmë, pronarët e drogës janë në fazën e tharjes, me qëllim përgatitjen për shitje të kanabisit. Forcat e Policisë, të përqendruara më së shumti në Jug të vendit, bllokuan dje një kapanon të përshtatur për tharjen e drogës. Kapanoni u zbulua në vendin e quajtur "Përroi i fshatit Odriçan", njësia administrative Piskovë, në Përmet. "Në një kapanon të përshtatur me llamarina u gjet lëndë narkotike në proces tharjeje, pesha totale e lëndës narkotike ishte 400 kg. Për shkak të terrenit të thyer, autorët kanë mundur të largohen", bëri të ditur Policia. Si- pas saj, po punohet për të identifikuar dhe kapur autorët, të cilët kur pikasën forcat e rendit, arritën të largoheshin, duke braktisur bimët narkotike. Nuk dihet nëse në këtë rast ka pasur dekonspirim të aksionit apo autorët janë sinjalizuar nga "rojet" e lëna për çdo rast. Pas gjetjes së drogës dhe bllokimit të një pjese të saj në cilësinë e provës materiale, policia i vuri flakën kaparonit, për të asgjësuar komplet aktivitetin ilegal.
Po në këtë qark, u zhvillua dje operacioni i tyre, nga i cili u arrit të sekuestroheshin 370 kg bimë kanabis sativa, edhe këto në proces tharjeje. Këtë herë, operacioni i Policisë u përqendrua në fshatin Kamçisht, Memaliaj, në banesën e shtetasve K. M. dhe F. M. Më herët ishte marrë informacion se në këtë banesë përpunohej lëndë narkotike dhe ashtu rezultoi. Nga kontrolli i ushtruar në këtë banesë, në dy bodrumet e saj dhe në një kasolle afër shtëpisë, u gjet lëndë narkotike në proces tharjeje, me peshë totale 370 kg. Policia shpalli në kërkim dy vëllezërit, pronarët e ambientit ku u gjet droga".
Aksioni i tretë u zhvillua në fshatin Povelçë të Fierit, ku u zbuluan 23 kilogramë lëndë narkotike, armë dhe u arrestuan dy persona. Policia bëri të ditur se prangosi fillimisht 41- vjeçarin Lavdimir Kapaj, pasi gjatë kontrollit në banesën e tij u gjetën dhe sekuestruan në cilësinë e provës materiale 23.2 kg kanabis dhe dy automatikë. Gjithashtu u arrestua në flagrancë edhe Mikel Isaj, 21 vjeç, banues në fshatin Qafë Gjashtë, Sarandë, pasi në çantën e tij të brezit policia gjeti të mbështjella në një letër alumini 50 fara kanabisi. Nga verifikimet e kryera rezultoi se mjeti tip "Benz", ku udhëtonte Isaj, dyshohet si automjet i vjedhur dhe i trafikuar në Shqipëri.