Debati në sallën e gjyqit, avokati: S'ka prova për grup të strukturuar
TIRANE - Seanca gjyqësore në ngarkim të Kujtim Rexhepit u shoqërua me debat të fortë juridik mes palëve. Ardian Visha, avokati mbrojtës i të dyshuarit Kujtim Rexhepi, i kërkoi gjykatës shpalljen e moskompetencës për shqyrtimin e kërkesës së prokurorisë për caktimin e një mase sigurie ndaj klientit të tij. Në një debat të ashpër me palën kundërshtare, avokati Visha ngriti pretendime për paligjshmëri të disa prej akteve të paraqitura në proces, pasaktësi dhe mospërputhje datash. Duke iu referuar akteve të vëna në dispozicion nga gjykata, avokati u shpreh që në një procesverbal thuhej se operacioni ishte urdhëruar nga Prokuroria për Krimet e Rënda, ndërsa në një tjetër thuhej se magazina u zbulua nga një operacion i rastësishëm. Avokati Visha pretendoi se Prokuroria për Krimet e Rënda nuk ishte kompetente për këtë hetim, pasi në rastin në fjalë nuk provohet që të kemi të bëjmë më një grup të strukturuar kriminal. "Kemi të bëjmë me një përvetësim kompetence nga ana e Prokurorisë për Krimet e Rënda pa prova dhe dyshime të arsyeshme", tha avokati. Përfaqësuesi i prokurorisë në sallën e gjy- qit tha se dyshimi paraprak është krijuar nga numri i madh i personave të angazhuar në magazinën ku u gjet droga, numri i automjeteve që hynin dhe dilnin prej saj, si dhe për shkak të sasisë të konsiderueshme të lëndës narkotike të bllokuar në të. "Për shkak të sekretit hetimor nuk mund të japin shpjegime më të hollësishme se kaq", tha prokurori Trenova. Duke u këshilluar në vend, gjyqtari Sandër Simoni nuk pranoi kërkesën për shpallje të moskompetencës. Gjyqtari sqaroi për palët se momentin procedural të kësaj dosjeje penale, vlerësimi i kompetencës bëhet nga ana e organit të Akuzës.