Hajrie Rondo ‘ Mirënjohje e Tiranës’, Veliaj: Frymëzim për të rinjtë
Aktorja e madhe shqiptare, Hajrie Rondo, mori dje mirënjohjen e qytetarëve të Tiranës për kontributin e aj në skenën e teatrit dhe të filmit. Personazhi i njohur i Tanës te "14 vjeç dhëndër" u vlerësua me "Medaljen e mirënjohjes", titull të cilin ia dorëzoi kryebashkiaku Erion Veliaj. "Për ne është një bekim, një inkurajim i jashtëzakonshëm që more përsipër këtë sfidë. Duke marrë përsipër këtë, i ke dhënë kurajë kaq shumë djemve, vajzave, njerëz që ndoshta po kalojnë vështirësi dhe dramat e tyre, por duke parë kurajën tënde, sot janë bërë me krahë. Të falënderojmë shumë dhe të japim këtë medalje, si mirënjohje dhe respekt nga gjithë qyteti i Tiranës, për gjithë kontributin tënd ndër vite, sidomos për kurajën që na ke dhënë këto ditë, duke u rikthyer në skenë, e duke na e rikthyer shpresën të gjithëve", u shpreh Veliaj në ceremoninë e dorëzimit të medaljes. Pas falënderimeve për vlerësimin, aktorja e mirënjohur Rondo iu dha fjalën qyteta- rëve se do të luftojë për skenën, atë që e quajti shtëpinë e vet. "Kur ma bënë ofertën, isha në dilemë ta marr apo jo. Të rri në shtëpi, të mbyllem dhe të bashkëbisedoj e trishtuar me sëmundjen, apo t'i them asaj def, ik tutje, sepse kam punë? Zgjodha këtë të dytën, bëra mirë dhe ia dola. U lodha një çikë, por stafi, drejtoresha, regjisorja dhe kolegët, ma amortizuan dhe ma lehtësuan sëmundjen. Betohem dhe të jap fjalën se do të luftoj, do të luftoj fort t'i ngjit prapë ato shkallë, ajo është shtëpia ime". Në fjalën e saj, Rondo rezervoi disa fjalë edhe për punën e kryebashkiakut Veliaj për një qytet më të jetueshëm. "Ju i keni dalë zot kryeqytetit, kësaj Bashkie, bravo! Puna e mirë dhe e bukur nuk të lë kurrë në baltë, nuk të tradhton kurrë. Përveç kësaj, në marrëdhënie me qytetarët ju jeni simboli i qytetarit të civilizuar. Ju keni sinqeritetin e një fëmije dhe mençurinë e një plaku të urtë. Faleminderit!" Aktorja e madhe është rikthyer në skenë vetëm pak kohë pasi fitoi betejën me vdekjen.