Skënderbeu ‘ blof’ me Kukësin, Partizani fiton
Salihi shpërdoron nga pika e bardhë, ndeshje pa gola në Korçë
Përfundon pa gola ndeshja e madhe e javës së tetë të Kategorisë Superiore.
Në Korçë, Skënderbeu dhe Kukësi u ndanë në një barazim 0- 0 në fund të një 90minutëshi të luftuar, sidomos në pjesën e dytë. Vendasit ishin më kërkues gjatë gjithë lojës dhe shpërdoruan disa raste të pastra për shënim, madje në minutën e 56- të shtylla i mohoi golin Hamdi Salihit nga penalltia. Ky barazim më tepër i shkon për shtat Partizanit, që e ngushton në vetëm dy distancën e pikëve nga korçarët një javë para përballjes direkte. Kurse Kukësi për momentin konfirmohet forca e tretë e kampionatit, në kuotën 14. Verilindorët mbeten i vetmi ekip pa humbje në këtë kampionat.
KORABI- PARTIZANI
Partizani ka arritur të mposhtë me rezultatin minimal 0- 1 Korabin në takimin e vlefshëm për javën e 8- të të Kategorisë Superiore të zhvilluar në "Selman Stërmasi". Një gol i ganezit Kaleb Ekuban ka mjaftuar që ekipi i Starovës të marrë fitoren e 3- të radhazi. Një gafë e portierit Vujadinoviç e ndihmoi shumë Ekubanin që të shënonte golin. Pas këtij takimi, Partizani ngjitet në kuotën e 17 pikëve, duke mbetur në vend të dytë, por duke iu afruar provizorisht me vetëm 1 pikë Skënderbeut, që luan më vonë me Kukësin. Ndërkohë Korabi merr humbjen e 3- të radhazi duke mbetur në kuotën e 5 pikëve, provizorisht në vendin e parafundit në renditje.
LAÇI- FLAMURTARI
Laçi dhe Flamurtari kanë ndarë nga një pikë në barazimin 1- 1 mes dy skuadrave në fushën e kurbinasve. Dy skuadrat aktualisht gjenden pranë fundit të tabelës së klasifikimit dhe ishin në kërkim të një suksesi për të dalë sa më shpejt nga kriza dhe për t'iu larguar fundit. Edhe pse vendasit dominuan në pjesën e parë, u goditën nga kundërsulmi i shpejtë i Radoviç, i cili dhuroi spektakël me një depërtim në krahun e djathtë. Në të dytën, atëherë kur Laçi dukej i dorëzuar me humbjen, erdhi goli i mbrojtësit të talentuar Bruno Lulaj, i cili ashtu si në ndeshjen e mëparshme ndaj Vllaznisë, rezultoi vendimtar me golin e tij, duke e ndihmuar skuadrën të marrë pikë.