Manjani për Tahirin e Kodhelin: Ta shkulim hashashin nga mendja
USHTRIA KUNDER KANABISIT, MINISTRI I LSI POLEMIZON ME KOLEGET E PS
Ministri i Drejtësisë, Ylli Manjani, nuk tërhiqet nga kërkesa e tij për të nxjerrë Ushtrinë në terren për të luftuar kultivimin e lëndëve narkotike. Përmes një reagimi në “Facebook”, Manjani, ndonëse ka theksuar se nuk kërkon të bëjë polemikë me asnjë nga kolegët e tij ministra, ka kthyer një përgjigje për qëndrimet e mbajtura nga ministrja e Mbrojtjes, Mimi Kodheli. Teksa ministrja e Mbrojtjes deklaroi se Ushtria angazhohet për gjëra serioze, Manjani dha argumentet e tij përse lufta kundër kultivimit të lëndëve narkotike është shumë serioze dhe duhet luftuar në kohë. Manjani i ka kujtuar të gjithë qeverisë se është mirë që kjo luftë të fitohet në kohë, sepse në të kundërt, trafikantët me kalimin e kohës do të “modernizojnë” infrastrukturën dhe do të blejnë politikën.
Nuk ka gjë më serioze sesa të shërbesh në një detyrë publike. Të shërbesh si ministër është edhe më serioze. Kështu që diskutimi mbi seriozitetin e të qenit serioz është i pavend.
E fundit gjë që kisha menduar dhe ende e mendoj është të bëj polemika publike me kolegët ministra. Qeveria është një institucion kushtetues i rëndësishëm që bazohet në ligjshmëri, kolegjialitet, përgjegjësi, solidaritet, por edhe konfidencialitet.
Çështja e shkuljes së hashashit nga toka, por edhe nga mendja jonë, është sot më seriozja! As shoqëria, as ekonomia, as politika, as biznesi ( rinia jo e jo) nuk kanë hajër nga hashashi. Përhapja e këtij fenomeni është katastrofë për të gjithë ne. Prandaj e përsëris edhe një herë atë që thashë të martën e shkuar: Nga ky fenomen duhet të ndahemi tani. Më vonë do të jetë shumë vonë.
Tani është momenti për t'i dhënë dërrmën kësaj të keqeje, që është ende në fazat e hershme të tij! Më vonë do të jetë vonë, sepse trafikantët do të kenë "modernizuar" infrastrukturën, do të kenë blerë politikën dhe do të kenë në dorë ligjin. Rinia e sotme nuk mund të rritet me trupin që i merr formën e karriges dhe me mendjen e trullosur nga tymi "dehës" i hashashit! E ardhmja jonë është më serioze sesa kaq.
Tani është momenti të shfarosim farën e hashashit, sepse na duhet krahu i punës për ekonominë e ligjshme kombëtare. Ekonomia nuk zhvillohet dot nëse krahu i punës joshet të "dalë partizan" nga ekonomia rraskapitëse e hashashit.
Tani duhet të ndërhyjmë fort e me mend në kokë që të parandalojmë ngjarje kriminale që burojnë natyrshëm nga hashashizimi i shoqërisë. Duhet të ndalojmë farën e hashashit, por edhe rekrutimin e "ushtarëve", që ruajnë parcelat e paligjshme dhe bosët e tyre që kërcënojnë sigurinë tonë publike.
Të gjithë duhet të jemi pro shfarosjes së kësaj të keqeje, më e madhja që kemi sot midis nesh! Të gjithë pa dallim: policë, ushtarë, politikanë e zyrtarë të gjithë pa dallim.
Kjo nuk është batutë, por realitet shumë serioz. Çështjet serioze kërkojnë reagime serioze. Dhe serioziteti nuk përcaktohet nga cilësia e kolltukut që i ofron detyra publike.
Nuk janë ligjet pengesa. Nuk ka ligj që mbron kultivuesin e as trafikantin. Ashtu siç nuk ka drejtësi të besueshme që merret me përdoruesin egërsisht dhe me trafikantin "miqësisht".
Duhet ta ndreqim dhe ligjin, pa dyshim! Por ligji ndreqet shumë më mirë kur zbatohet mirë.
Nuk dua të hyj aspak në garën e propozimeve publike të projektligjeve, sepse unë nuk jam në garë me askënd për të bërë detyrën time. Por për kuriozitetin tuaj, që në prill të këtij viti kam depozituar në qeveri projektin për ndryshime në Kodin Penal. Ky projekt është aty, në qeveri, në pritje për miratim.
Edhe një herë: O tani, o kurrë më!
Tani është momenti për t'i dhënë dërrmën kësaj të keqeje, që është ende në fazat e hershme të tij! Më vonë do të jetë vonë, sepse trafikantët do të kenë "modernizuar" infrastrukturën, do të kenë blerë politikën dhe do të kenë në dorë ligjin. Rinia e sotme nuk mund të rritet me trupin që i merr formën e karriges dhe me mendjen e trullosur nga tymi "dehës" i hashashit! E ardhmja jonë është më serioze sesa kaq