Apel Ramës e Bashës, 10 propozimet e 7 akademikëve për reformat
“Të krijohet Senati, të rriten rrogat e politikanëve, të legalizohet lobimi, platformë kombëtare për punësim e sektorët strategjikë”
“Pakti për Reformizmin” është nisma që shtatë pedagogë të Universitetit Europian të Tiranës kanë hartuar si një ofertë për maxhorancën dhe opozitën aktuale, dhe posaçërisht për Kryeministrin Rama dhe liderin e opozitës, Basha.
Përmes 10 propozimeve konkrete, grupi i ekspertëve të angazhuar në këtë iniciativë paraqesin zgjidhjen për shumë prej proceseve ekonomike, sociale, politike apo kulturore, që gjenden sot në udhëkryq. “Pakti për Reformizmin” mban firmën dhe idetë e profesorëve Selami Xhepa, Luljeta Minxhozi, Edi Puka, Arbi Agalliu, Hemion Braho, Ledia Dushi dhe Roland Lami. Në propozimin e tyre, akademikët theksojnë se masat e propozuara prej tyre janë të nevojshme të merren parasysh, qoftë edhe jo plotësisht, nga krerët më të lartë politikë në vend. Propozimet lidhen me elemente shtetformuese dhe mbështetja e tyre nuk do të përkthehej në kapital politik për asnjë nga drejtuesit e partive, megjithatë sipas akademikëve implementimi i tyre do të nxirrte vendin nga tranzicioni i gjatë që e ka shoqëruar në gjithë këto vite.
REFORMA Grupi i akademikëve që kanë hartuar “Paktin e Reformizmit” e shohin të nevojshme një reformë kushtetuese, që do ta çonte vendin drejt një republike të re. Kjo reformë, sipas propozuesve, duhet të hyjë në fuqi pas zgjedhjeve të 2021, në mënyrë që shumica qeverisëse të mos jetë e interesuar për të influencuar apo krijuar mundësitë e përfitimeve aktuale. Në thelb të këtij propozimi është krijimi i një parlamenti me dy dhoma, për të krijuar një Dhomë të dytë në Parlamenti, pra Senatin e Republikës. Me raportin 100 deputetë të Dhomës së parë dhe afërisht 3 senatorë për qark, plus gjithë ish- presidentët e Republikës, të cilët do të krijonin një ekuilibër real. Reforma e dytë që akademikët propozojnë lidhet me financimin më të mirë të jetës së politikanëve. Sipas tyre, është e nevojshme që profesioni i politikanit të paguhet në mënyrë të ligjshme, rrënjësisht më mirë. Propozuesit e “Paktit të Reformizmit” e shohin si imediate krijimin e një profili të njerëzve të aftë, të ndershëm dhe të drejtë. Njëkohësisht profesorati i UET- së kërkon liberalizimin e lobimit. Në thelb të këtij propozimi është heqja me ligj e çdo kufizimi për lobimin financiar të grupeve të interesit, të kompanive të ndryshme, apo pjesëve të ndryshme të ekonomisë, të organizuara në pjesë të caktuara të sektorëve të ndryshme të lobeve.
PUNËSIMI Profesorati i angazhuar për hartimin e “Paktit të Reformizmit” propozon edhe një platformë kombëtare për punësimin. Propozimi në fjalë sugjeron për klasën politike që çdo politikë ekonomike e financiare dhe çdo alokim shpenzimesh buxhetore, të ketë si kriter themelor punësimin dhe të ardhurat e kënaqshme që ai krijon nga puna. Sa u takon politikave fiskale, profesorët e angazhuar në këtë nismë propozojnë krijimin e një sistemi fiskal të thjeshtë nga pikëpamja e administrimit, ku të spikasë një taksë unike mbi kapitalin dhe të ardhurat, njënivelëshe, e rendit 12%, shoqëruar me politika preferenciale për investimet strategjike dhe me kontribut të lartë në krijimin e vendeve të reja të punës.
Profesorët propozojnë mbështetje për të gjithë sektorët strategjikë të ekonomisë në vend. Sipas tyre, duhet parë me prioritet sektori i bujqësisë dhe duhet shfrytëzuar me eficiencë kapaciteti energjetik që kemi. Në paketën e “nevojave bazë”, hartuesit e “Paktit të Reformizmit” propozojnë dhënien e një pensioni social për të gjithë qytetarët dhe banorët e zonave rurale në moshën mbi 65- vjeçare, në vlerën e 100 eurove në muaj. Propozohet gjithashtu një sërë masash që shoqëria duhet të vendosë në dispozicion të të pamundurve. Sipas profesorëve, kjo paketë dinjiteti do të përbënte një siguri për familjet nën kufirin zyrtar të varfërisë, për nevojat e tyre bazike.
Në paketën e “nevojave bazë”, hartuesit e “Paktit të Reformizmit” propozojnë dhënien e një pensioni social për të gjithë qytetarët dhe banorët e zonave rurale në moshën mbi 65- vjeçare, në vlerën e 100 eurove në muaj