Majko: Kosova të respektohet si shtet, ka mosinformim
"Ne mund të mos jemi lojtarë globalë, por nëse preket sovraniteti i Kosovës, Shqipëria hyn në konflikt me cilindo"
Deputeti socialist dhe ishkryeministri, Pandeli Majko, pranon se në deklaratat që Kryeministri Rama mbajti në Serbi për Kosovën ka pasur edhe tejkalime, por sipas tij kjo nuk duhet parë si një vakum i marrëdhënieve Shqipëri- Kosovë.
Në një intervistë për "KosovaPress", Majko deklaron se do të mjaftonte një vizitë urgjente në Tiranë e ministrit të Punëve të Jashtme të Kosovës, Enver Hoxhaj, që të mund të zgjidhej kjo çështje, duke mos u bërë konsumues të deklaratave që shumë analistë i marrin dhe i kthejnë në doktrina për të krijuar dallime midis Shqipërisë dhe Kosovës. Majko thotë se ka ekzistuar mosinformimi mes qeverisë së Shqipërisë e Kosovës dhe se çfarëdo të diskutohet në Beograd, sipas tij, ky është problemi esencial. E nëse Kosova dhe Shqipëria do të shkojnë përballë Serbisë të pakoordinuara, Majko theksoi se sërish do të jemi përballë një historie të tillë. Për këtë ai tha se vlerëson ndjeshmërinë e Prishtinës e që Shqipëria duhet t'u shpjegojë të gjitha institucioneve të Kosovës se çfarë ka ndodhur.
"Një lloj mosinformimi që ka ekzistuar lidhur me atë se çka do të diskutohej në Beograd midis qeverisë së Shqipërisë dhe qeverisë së Kosovës, mendoj se ky mund të konsiderohet problemi më esencial në koordinim dhe informim midis dy palëve, i cili është shumë i detyrueshëm për marrëdhëniet që të dyja vendet kanë me Serbinë. Nëse Kosova dhe Shqipëria do të shkojnë përballë Serbisë të pakoordinuara, sigurisht që ne do të ndodhemi përballë një historie të tillë, sikur kjo e sotmja, çka u tha, pse u tha, pse ndodhi. Sigurisht, nuk jam në një opinion me një pjesë që këtë ngjarje e morën për të krijuar një debat qoftë në Shqipëri, qoftë në Kosovë, për ta sigmatizuar si problem midis Shqipërisë dhe Kosovës. Në marrëdhënie me Beogradin, marrëdhënia shqiptaro- serbe është shumë e gjatë, ka pasur brenda vetes marrëdhënie të shumë kryeministrave dhe sigurisht edhe shumë gabime, të cilat vijnë përgjithësisht nga pala shqiptare dhe këtë duhet ta pranojmë siç është. Si qytetar i Kosovës e vlerësoj shumë ndjeshmërinë e Prishtinës dhe në këtë drejtim mendoj se Shqipërisë i nevojitet një punë shumë specifike, edhe nga ana njerëzore, për t'u shpjeguar të gjithë përfaqësuesve të institucioneve të Kosovës atë çfarë ka ndodhur".
Tejkalimi i deklaratave të Ramës në Beograd, sipas Majkos, duhet të përdoret si një mësim për të ardhmen, duke shtuar se Kosova është shtet, ka një elitë shtetërore e cila duhet respektuar. Ish- kryeministri shqiptar vlerëson se Kosova dhe Shqipëria janë vëllezër dhe nuk kanë gardh për të ndarë, por duhet kuptuar si historia e dy vëllezërve që kanë shtëpitë e veta. "Duhet bërë një mësim për ata që do të vijnë më pas. Ka një mënyrë të pamësuari edhe për një pjesë të elitës politike në Shqipëri që e mendon ende Kosovën edhe shtet, edhe joshtet. Kosova është shtet, ka një elitë shtetërore e cila duhet respektuar nga fillimi deri në fund, sikurse respekton një shtet të cilin nuk e ke fqinj, pavarësisht që jemi vëllezër, flasim të njëjtën gjuhë, kemi të njëjtën histori, ne duhet të arrijmë ta kuptojmë se kjo është historia e dy vëllezërve që kanë shtëpi më vete, sigurisht që nuk kanë gardh për të ndarë, por janë disa detaje që ne duhet të jemi të kujdesshëm, qoftë Kosova me Shqipërinë, por sidomos Shqipërisë i takon pak më shumë me Kosovën", tha Majko.
Megjithatë Majko ka theksuar se, nëse preket sovranitetit i Kosovës, Shqipëria implikohet në konflikt me cilindo. "Ne mund të mos jemi lojtarë globalë, por ne mbetemi vendi i cili nëse preket sovraniteti i Republikës së Kosovës, Shqipëria hyn dhe implikohet automatikisht në konflikt me cilindo. Duke pasur parasysh këtë, pavarësisht që kjo nuk është shkruar ende në asnjë dokument, pavarësisht se Shqipëria dhe Koso- va të vetmen punë të përbashkët të dukshme kanë abetaren e klasës së parë. Nisur nga kjo, ne jemi ende duke krijuar një gramatikë të re, një fjalor të ri, i cili ka brenda një fakt që është krejtësisht i logjikshëm, ekzistenca e një elite shtetërore në Kosovë dhe nuk është një elitë dosido. Janë politikanë të cilët kanë shkruar historinë jo vetëm të Kosovës, por edhe të rajonit, janë njerëz të cilët dje kanë luftuar dhe sot janë në politikë, janë nga ata politikanë që vendet e tjera do të donin që t'i kishin pjesë të politikës së tyre për mënyrën se si ata i artikulojnë dhe se si ata kanë provuar shumë gjëra, që shumë politikanë qoftë në Perëndim, apo në Lindje, vetëm flasin", tha Majko për "KosovaPress".
Veç tjerash, deputeti socialist shtoi se Kosova dhe Shqipëria duhet të ndërtojnë politika të përbashkëta. Ai theksoi se kryeministrat e ministrat shqiptarë e kanë të nevojshme të bëjnë takime të përbashkëta në qendra të tilla si ajo në Bruksel, e që askush nuk do të mund të akuzonte se po bëhet Shqipëria e madhe. "Nuk do të mund ta imagjinoja se si do të funksiononte turizmi shqiptar pa shqiptarët e Kosovës dhe shqiptarët e Maqedonisë. Nisur nga këto ne kemi shumë elemente, të cilat duhet të diskutojmë dhe duhet të ndërtojmë politika të përbashkëta sepse jemi shqiptarë, në dy shtete të ndryshme. Ministrat tanë të Jashtëm, kryeministra apo ministra e fushave tjera, do ta kenë nevojshme që të bëjnë qoftë edhe vizita të përbashkëta në qendra të tilla siç janë Brukseli, Roma dhe askush nuk do të na akuzonte që po bëjmë Shqipërinë e madhe, përkundrazi sepse jemi kaq gjenetikisht afër njëri- tjetrit, kemi interesa të përbashkëta afër njëri- tjetrit. Të qenit përballë të tjerëve bashkë nuk na vënë nën akuzë, përkundrazi na bënë të natyrshëm', tha Majko.
“Kosovapress”
"Një lloj mosinformimi që ka ekzistuar lidhur me atë se çka do të diskutohej në Beograd midis qeverisë së Shqipërisë dhe qeverisë së Kosovës, mendoj se ky mund të konsiderohet problemi më esencial në koordinim dhe informim midis dy palëve, i cili është shumë i detyrueshëm për marrëdhëniet që të dyja vendet kanë me Serbinë. Nëse Kosova dhe Shqipëria do të shkojnë përballë Serbisë të pakoordinuara, sigurisht që ne do të ndodhemi përballë një historie të tillë, sikur kjo e sotmja, çka u tha, pse u tha, pse ndodhi.