Kontrollet e policisë, zbulohen 17 thasë me hashash në hidrovor
KURBIN- SARANDE- Zbulohen 17 thasë me lëndë narkotike, në hidrovorin e Shllinzes në Kurbin. Ka qenë punonjësi i hidrovorit, i cili ka pikasur disa thasë të mbushur që kishin ngecur në kanal. Pasi është afruar, ai ka konstatuar se brenda tyre kishte sasi lëndësh narkotike, ndaj menjëherë ka lajmëruar Policinë e Kurbinit. Këta të fundit janë nisur drejt vendit të ngjarjes, duke nisur verifikimet. Thasët me lëndë narkotike janë marrë nga policia dhe do të analizohen në laborator për të përcaktuar edhe llojin e drogës. Nga verifikimet e deritanishme është bërë e ditur se lënda narkotike dyshohet të jetë e llojit hashash. Policia ka nisur menjëherë hetimet në lidhje me këtë rast dhe personin që e ka hedhur atë në hidrovor. Dyshimet janë se droga mund të jetë hedhur nga ndonjë banor i zonës në kanalin e ujërave të larta nga frika e policisë, e cila një natë më parë po kryente kontrolle në zonën e Kurbinit. Ndwrkaq, Policia greke ka sekuestruar mëngjesin e djeshëm mbi 173 kg marijuanë që vinte nga Shqipëria. Operacioni është zhvilluar rreth orës 10: 00 nga njësia antidrogë në afërsi të fshatit Vrisella. Në aksin Filat- Igumenicë, pranë kufirit greko- shqiptar, policia ka ndaluar automjetin që drejtohej nga 44- vjeçari Alket Dhroso, nga Saranda. Gjatë kontrollit ka zbuluar në bagazh pako droge të shpërndara në 90 të tilla dhe nga peshimi i saj doli një sasi prej 173 kg e 981 gramësh drogë e llojit marijuanë. Sipas burimeve policore greke, droga është marrë nga 44-vjeçari Dhroso në kufirin e gjelbër, me qëllim futjen në brendësi të tokës greke.