Meta: Do ngre LSI- në në një stad më të lartë
“Do kemi Grupin Parlamentar të LRI- së brenda atij të LSI- së”
Kryetari i LSI- së, Ilir Meta, deklaron se kërkon një mandat të ri në krye të forcës së tij politike, për ta çuar në një stad të ri atë. Në një takim të zhvilluar me strukturat e Lëvizjes Rinore për Integrim të Durrësit, ku u shpërndanë 300 karta të reja anëtarësimi, Meta theksoi se synimi i tij është që në zgjedhjet e ardhshme të rritet përfaqësimi i të rinjve në Parlament. “Në 6 nëntor, unë do të jem kandidat për kryetar i LSI- së, jo thjesht për të marrë një mandat të ri të kryetarit të Lëvizjes Socialiste për Integrim, por e shoh këtë mandat të ri si mundësinë më të mirë që ta investoj për të ngritur LSI-në në një stad më të lartë, më të ri, më cilësor, më përfaqësues, më gjithëpërfshirës dhe për të realizuar një LSI shumë më të re, e cila e ndihmon Shqipërinë që të ecë me hapin e ëndrrave të të rinjve”, u shpreh Meta. Synimi i LSI- së në zgjedhjet e ardhshme parlamentare do të jetë krijimi në Parlament brenda Grupit Parlamentar të LSI- së edhe një Grup Parlamentar të LRI-së. “Në programin tim për të ardhmen, fuqizimi i LRI- së në të gjitha strukturat vendimmarrëse të Lëvizjes Socialiste për Integrim është prioritet kryesor në mënyrë që në Kuvendin e ardhshëm të Shqipërisë të kemi pa asnjë diskutim Grupin Parlamentar të LRI- së brenda Grupit Parlamentar të Lëvizjes Socialiste për Integrim”, shtoi kreu i LSI- së. Sipas Metës, mënyra e përfaqësimit të të rinjve në Parlament nga deputetet Kejdi Mehmetaj dhe Silva Caka ka qenë dinjitoz dhe premtues për shtimin e të rinjve në Parlament. “Unë besoj se cilësia e përfaqësimit të Kejdit, të Silvës ka treguar në mënyrën më të mirë aftësinë tuaj për të përfaqësuar me dinjitet të rinjtë dhe të rejat e Shqipërisë edhe në institucionin më të rëndësishëm të legjislativit”, tha Meta.