Ndihma ekonomike, si do të zgjidhen përfituesit
Klosi: Nuk do të ketë kritere përjashtuese, dyfishohet asistenca
Skema e re e ndihmës ekonomike nuk do të penalizojë askënd, duke i dhënë në këtë mënyrë mundësinë çdo familjeje që të aplikojë. Nuk ka rëndësi nëse ka tokë në pronësi, merr pension apo siguron të ardhura nga emigracioni.
Këto kritere përjashtuese, sipas ministrit të Mirëqenies Sociale, Blendi Klosi, do t’i takojnë së shkuarës.
SKEMA Tashmë me formulën e re të pikëzimit, e cila do të nisë zbatimin do të jenë 52 tregues që do të merren në konsideratë. Mbi bazën e tyre do të përllogaritet edhe masa e përfitimit. “Nuk ka kritere përjashtuese dhe kushdo mund të aplikojë. Përdoret një formulë e pikëzuar, ku çdo indikator ka fuqinë e tij dhe kalkulimi i së tërës vërteton nëse familja është e varfër apo jo. Janë 52 indikatorë që përcaktojnë varfërinë. Indikatorë të qartë që kanë të bëjnë me vetë familjen, me mundësinë që kanë për t’ia dalë me ndihmën ekonomike”, tha Klosi. Në muajin mars të këtij viti, qeveria zyrtarizoi edhe formularin e ri. Publikimi i tij shkaktoi jo pak bujë duke qenë se, përveçse informacionit bazë nga aplikantët, kërkohej edhe informacion mbi banesën, dritat, elektroshtëpiaket, gjënë e gjallë etj. Gjatë një takimi në Lezhë me kryetarët e bashkive dhe prefektët e qarqeve të Veriut, ministri e vuri theksin edhe në masën e ndihmës ekonomike, e cila, sipas tij, do të shkojë deri në 8 mijë lekë për familjet më në nevojë. Veç asistencës do të mundësohet mbështetje financiare edhe në sajë të disa programeve ekstra, siç janë dyfishimi i energjisë elektrike për personat me aftësi të kufizuara, invalidët e punës dhe pensionistët, pagesë ekstra për vaksinimin e fëmijëve etj. “Kush targetohet si i varfër do të marrë ndihmë të plotë. Për ta mbështetur skemën kemi përdorur subvencionet shtesë që kanë të bëjnë me shkollën e fëmijëve, me vaksinimin. Shmangia e dokumentacionit të tepërt sepse databaza është elek- tronike. Ajo që do të synojmë më fort është të kemi një evidentim më të qartë, një arsye pse familja është e varfër. Pa dyshim që skemat tona të mbështetjes sociale do të jenë më efikase”, theksoi ministri. Për qarqet e Veriut janë rreth 39 mijë familje që trajtohen me asis- tencë, pra gjysma e atyre që janë aktualisht pjesë e skemës.
PËRFITUESIT Një tjetër risi është fakti që përzgjedhja e listave të fituesve nuk do të bëhet nga kryebashkiakët, por edhe këshillat bashkiakë të cilët me anë të votës do të zgje- dhin 6 për qind të përfituesve. “Ne kemi dyfishuar mundësinë e vetë të zgjedhurve lokalë, këshillave bashkiakë, që nga lista e atyre që kanë aplikuar dhe dëshmojnë me fakte e me shifra se pse janë të varfër, deri në 6% të listës e kemi toleruar të jetë vendimmarrja e këshillave bashkiakë”, bëri me dije Klosi. Nëpërmjet skemës së re, përfituesit do të kenë detyrimin për t’u regjistruar në zyrat e punës si punëkërkues dhe nëse do të refuzojnë ofertat apo pjesëmarrjen në kurset profesionale, atëherë do të dalin nga skema.