Luftëtari thyen Tiranën, Vllaznia i falet një eurogoli
Endri Vrapi nderon shkodranët, tri pikë përballë Teutës
Tirana ka pësuar humbjen e parë për këtë sezon në Kategorinë Superiore, teksa në javën e 8të është mposhtur nga Luftëtari në takimin e luajtur në fushën asnjanëse të stadiumit të Peqinit.
Në një ndeshje të zhvilluar në një fushë të rëndë, përballë një kundërshtari me kualitete teknike dhe me dy mungesa të rëndësishme në krahët e mbrojtjes, bardheblutë kanë shfaqur disa dobësi. Jo vetëm gabime individuale në prapavijë, por edhe një mesfushë që nuk ka filtruar si duhet si dhe një sulm që nuk ka arritur të udhëheqë skuadrën drejt suksesit. Për gjirokastritët ka qenë një ndeshje në të cilën me rastet që kanë krijuar, duhet jo vetëm të merrnin tri pikët, por edhe të përmirësonin golavarazhin. Rexhinaldo dhe Bregu ishin autorët e dy golave për gjirokastritët që siguruan 3 pikë me shumë vlerë. Ndërkohë, goli i Takut nuk vlejti për më shumë se një barazim të përkohshëm. Përveç golit, duhet theksuar që Bregu dhuroi një paraqitje fantastike gjatë gjithë takimit. Pas kësaj ndeshjeje, Luftëtari ngjitet në kuotën e 10 pikëve duke mbajtur vendin e 6 në renditje, ndërsa Tirana mbetet në kuotën e 13 pikëve në vendin e 4- t.
VLLAZNIA- TEUTA
Vllaznia ka arritur sot fitoren e dytë në këtë sezon, duke mundur me rezultatin minimal 1- 0 Teutën në një ndeshje ku dukej qartësisht se shkodranëve u interesonte vetëm fitorja e tri pikëve. Në fund të një pjese të parë me shumë zotërim topi, por pa raste të mirëfillta për të shënuar, avantazhi i ekipit vendës erdhi falë një perle të Endri Vrapit me goditje dënimi, një gjuajtje e rrallë me të majtën që përfundoi poshtë kryqëzimit të shtyllave. Në pjesën e dytë, Vllaznia i la komplet manovrën në dorë ekipit kundërshtar, duke u tërhequr në mbrojtje të rezultatit. Por Teuta nuk kishte forcë të nxirrte golin në këtë sfidë dhe u desh të dorëzohej ndaj një humbjeje tjetër që e mban në fundin e tabelës së klasifikimit.