Cikalleshi humb pa lënë gjurmë, vlerësime për Hysajn e Veselin

LLULLAKU MODEST: ISHA DOBËT NË TË PARËN

Azdren Llullaku vazhdon të shënojë me rregullsi, duke thyer rekordet personale në kampionatin rumun me fanellën e Gaz Metan dhe duke u konfirmuar si një nga lojtarët më në formë në këtë kampionat. Por sulmuesi i Kombëtares duket se nuk është i kënaqur me faktin se në ndeshjen e fundit shënoi dy gola. "Sigurisht që tri pikët do të kishin qenë ishin shumë të rëndësishme për ne, por luajtëm kundër skuadrës më në formë të Rumanisë. Në pjesën e parë unë isha inekzistent në fushën e lojës, por pastaj rikuperova në të dytën. Shënova dy gola, por nuk e mendoj asnjëherë titullin e golashënuesit, vetëm për fitoret me skuadrën", tha Llullaku për mediat rumune.

Kjo javë ka qenë deri diku pozitive për pjesën më të madhe të legjionarëve, ndërkohë që ka edhe disa prej tyre që ndjekin sfidat nga tribuna apo edhe vlerësohen dobët kur janë në fushë.

Seria A - Peskara është mundur me shifrat 3- 1 përballë Udinezes. Formën e dobët të skuadrës po e vuan shumë edhe Ledian Memushaj. Mesfushori kishte një mundësi të mirë shënimi në fillimin e ndeshjes, por e shpërdoroi atë. Sfida u mbyll me humbjen 3- 1 dhe Memushaj u vlerësua si një nga më të dobëtit në fushë në këtë duel. Portali "tuttomercatoweb" i vuri atij notën 5 pas duelit: "Luante shumë në krah dhe dukej thuajse si i humbur. Ka vështirësi të hyjë në lojë, përveç rastit që kishte në këmbë në minutat fille- stare të takimit". Ditë pozitive për dy mbrojtësit e djathtë të Kombëtares shqiptare në Serinë A italiane. Hysaj u rikthye si titullar te Napoli në takimin në transfertë përballë Krotones dhe u vlerësua me notën 6 për paraqitjen e tij. Ndërkohë, Empoli i Frederik Veselit nuk shkoi dot më shumë se barazimi 0- 0 në shtëpi përballë Kievos. Mbrojtësi shqiptar u aktivizua në minutën e parë shtesë të pjesës së parë, pas dëmtimit të Laurinit. Paraqitja e Veselit u vlerësua me notën 6 nga mediat italiane, i cili luante vetëm takimin e tij të dytë në Serinë A. Ndërkohë "derbi" i shqiptarëve, Ajeti dhe Strakosha në Torino- Lacio, u zhvillua nga stoli pasi asnjëri prej tyre nuk u aktivizua. Turqi - Sokol Cikalleshi i ka ditët të numëruara në radhët e Basaksehir dhe kjo duket qartësisht nga fakti se ai nuk figuron prej kohësh në protokollin e ndeshjeve të skuadrës së tij në kampionatin turk. Edhe në duelin e djeshëm të luajtur nga kryesuesit e kampionatit turk ndaj Karabukspor, Cikalleshi ka qenë një tifoz i thjeshtë, pasi trajneri Avçi nuk e kishte grumbulluar për sfidën, ashtu siç ka ndodhur rregullisht në dy muajt e fundit.

Kroaci - Ka qenë e mbrapshtë kjo fundjavë për Lokomotivën e Zagrebit, ku aktivizohen Eros Grezda dhe Amir Rrahmani. Skuadra nga kryeqyteti kroat u mund 1- 0 nga Osijeku në xhiron e 13- të të Ligës së Parë.