Dekorohen 67 ballistët e vrarë nga Mehmet Shehu, Milo: S’kanë merita, ishin në krahun e pushtuesve
PRESIDENTI I SHPALL “MARTIRE TE DEMOKRACISE” NE 73- VJETORIN E MASAKRES. FATOS KLOSI: QESHARAKE
Presidenti i Republikës, Bujar Nishani, u ka akorduar titullin “Martir i Demokracisë” 67 ushtarëve të Ballit Kombëtar, të pushkatuar në vitin 1943. Ceremonia u zhvillua ditën e premte në Divjakë të Lushnjës, në ditën e 73- vjetorit të masakrës. Ka qenë sekretari i përgjithshëm i Presidencës, Florian Nuri, i cili ka dorëzuar dekoratat në emër të institucionit të Presidentit të Republikës. Ky titull u akordua me motivacionin: “Me mirënjohje dhe vlerësim për të gjithë ata burra nacionalistë e të pamposhtur që luftuan për një Shqipëri të lirë, demokratike dhe të vëllazëruar. Në shenjë nderimi për rezistencën e tyre të paepur, deri në sakrifikim, kundër instalimit të regjimit komunist diktatorial në Shqipëri”. Sipas historianit Uran Butka, i cili mbajti edhe fjalën e rastit në këtë ceremoni, masakra e Lushnjës është më e madhja që ka ndodhur ndonjëherë, duke arritur në 80 veta. Sipas Butkës, ka qenë Brigada e Parë Sulmuese, me në krye Mehmet Shehun, që shkaktoi këtë masakër, pas një sulmi ndaj forcave nacionaliste të komanduara nga Tefik Cfiri dhe Isa Manastirliu, dy komandantë të çetave të Ballit Kombëtar, në afërsi të Lushnjës, te kodra e Cen Hasanit në fshatin Golem, më 21 tetor 1943. “Pas betejës, Mehmet Shehu urdhëroi, në kundërshtim me çdo rregull lufte, pushkatimin e 65 robërve, që s’ishin tjetër veçse luftëtarë të thjeshtë e të rinj të pafajshëm, bujq nga fshatrat e Myzeqesë, që nuk pranuan të bashkoheshin me Brigadën I Sulmuese ( vetëm njëri pranoi) dhe nuk donin të luftonin më, po të ktheheshin në shtëpitë e tyre. Ata që nuk i zuri plumbi, i theri thika e Dushan Mugoshës, zëvendëskomisarit të Brigadës me pseudonimin Salë. Atje nuk kishte as italianë, as gjermanë, kish vetëm shqiptarë që luftonin kundër njëri- tjetrit, kishte dhe një të huaj, një komunist malazez që ushtronte luftën kundër shqiptarëve si një zanat i vjetër. Kemi të bëjmë me një krim lufte kundër njerëzimit: Vrasja e robërve të luftës”, thotë Butka.