PAKTI PER REFORMIZMIN

REFORMA 1 - Reformë kushtetuese dhe politike drejt një Republike të Re

Nevoja e një reforme kushtetuese, që të futej në fuqi pas zgjedhjeve të 2021, edhe kjo, në mënyrë që shumica aktuale të ishte e painteresuar për ta influencuar, me qëllim përfitimesh, brenda mandatit. Kjo reformë të mundësojë krijimin e Senatit, për të agreguar dhe mos nxjerrë jashtë sistemit vlerat e elitës politike, që konkurrimi elektoral për Parlamentin shqiptar i përjashton; për të krijuar një Dhomë të dytë Parlamenti, pra SENATIN E REPUBLIKËS.

REFORMA 2 - Financimi rrënjësisht më i mirë i jetës politike

Ne besojmë se themeli, përveç elementëve të natyrshëm të korrupsionit në shtresa ose segmente të caktuara të elitës politike, që mban në këmbë dhe ushqen një korruptim të përgjithshëm të elitës politike apo administratës së lartë shtetërore është niveli i ulët i pagës që merr elita politike dhe administrata publike, duke filluar nga Presidenti i Republikës e deri në nivelet e ulëta të shërbimit publik, përfshirë edhe sistemin gjyqësor, që tashmë është zgjidhur me reformën e saporealizuar. Nevoja që profesioni i politikanit të paguhet, në mënyrë të ligjshme, rrënjësisht më mirë, është imediate për të krijuar një profil të njerëzve të aftë, të ndershëm dhe të drejtë në shërbim të publikut në elitën tonë politike dhe më gjerë, në administratën publike.

REFORMA 3 - Legalizimi i lobimit. Ligji i ri për Shoqërinë Civile dhe defiskalizimi i mecenatit kulturor

Shoqëritë perëndimore e kanë përballuar dhe kanalizuar pozitivisht ndikimin e grupeve të interesit, duke legalizuar çdo formë të lobimit të tyre në politikëbërjen publike dhe në jetën politike. Një LIGJ I RI PËR LOBIMIN, që të legalizojë dhe të heqë çdo kufizim për lobimin financiar të grupeve të interesit, të kompanive të ndryshme apo pjesëve të ndryshme të ekonomisë, të organizuara në pjesë të caktuara të sektorëve të ndryshme të lobeve, sipas frymës së Gjykatës Supreme Amerikane për këtë çështje, do të rriste transparencën dhe asgjësonte premisat për korrupsion dhe influenca të paligjshme për trafik influencash.

REFORMA 4 - Platformë kombëtare e zhvillimit të qëndrueshëm.

Ne mendojmë se zhvillimi i ekonomisë dhe sipërmarrjes private duhet të respektojnë standardet më të larta mjedisore, duke rritur fuqimisht forcën zbatuese të ligjit. Po kështu, rehabilitimi mjedisor nga dëmtimet ai që ka pësuar nga shfrytëzimi pa kriter në këto vite tranzicioni, është në kufijtë e emergjencës. Për këtë qëllim, një plan kombëtar që të përvijojë objektivat dhe planin e masave që duhet të realizohen nga autoritetet publike, duhet të fillojë të hartohet duke angazhuar potencialet më të mira profesionale të vendit.

REFORMA 5 - Platformë kombëtare për punësim dhe të ardhura dinjitoze nga puna.

Në sugjerojmë që çdo politikë ekonomike e financiare, çdo alokim shpenzimesh buxhetore, çdo prioritet sektorial apo masë tjetër politike favorizuese për sipërmarrjen private, të ketë si kriter themelor, ndoshta dhe të vetëm të gjykimit të saj, punësimin dhe të ardhurat e kënaqshme që ai krijon nga puna. Në veçanti, programet e nxitjes së punësimit duhet të lidhen me arritjen e objektivave jo vetëm sasior, por edhe cilësor në punësim.

REFORMA 6 - Një politikë fiskale e qëndrueshme, mbështetëse për zhvillimin e sipërmarrjes dhe dekurajuese për mosshfrytëzimin e aseteve.

Ne propozojmë një sistem fiskal të thjeshtë nga pikëpamja e administrimit, ku të spikasë një taksë unike mbi kapitalin dhe të ardhurat, njënivelëshe, e rendit 12%, shoqëruar me politika preferenciale për investimet strategjike dhe me kontribut të lartë në krijimin e vendeve të reja të punës. Ne nuk do formojmë dot qytetarë të përgjegjshëm ndaj taksave, nëse nuk kalojmë realisht në sistemin e “Numrit fiskal personal”, për të gjithë qytetarët mbi 18 vjeç. Duhet fiksuar një taksë për tokat dhe pasuritë, tokat bujqësore ose jobujqësore të papërdorura, duke nxitur kështu shfrytëzimin e tokës dhe pasurive të tjera natyrore, dhe duke ndikuar në krijimin e tregut real të shitblerjes së tokës.

REFORMA 7 - Identifikim dhe mbështetje e përforcuar e sektorit strategjik të ekonomisë

Ne mendojmë se është me rëndësi hartimi i politikave të posaçme dhe mbështetëse që ndihmojnë këta sektorë të fuqizojnë lidhjet e krijuara, e rrisin më tej produktivitetin e tyre. Në veçanti, inkurajojmë mbështetje të fuqishme për sektorin e bujqësisë, shfrytëzimin më eficient të kapacitetit energjetik dhe të burimeve natyrore të vendit.

REFORMA 8 - Fuqizimi i konkurrencës dhe lufta ndaj monopoleve

Garantimi i konkurrencës së lirë realizohet nën mbikëqyrjen e tregjeve dhe rregullimin e funksionimit të tyre, mbi bazën e standardeve më të përparuara europiane. Prandaj, fuqizimi i institucioneve të mbrojtjes së konkurrencës dhe mbikëqyrjes së tregut duhet të jenë ndër objektivat më të rëndësishme të politikave qeveritare.

REFORMA 9 - Thellim i liberalizimi i tregut dhe standarde ndërkombëtare në ofrimin e shërbimeve publike, veçanërisht në arsim dhe shëndetësi

Ofrimi i shërbimeve publike, në veçanti arsimi dhe shëndetësia, duhet të marrin mbështetje të përshtatshme nga buxheti publik, në mënyrë që funksionimi i tyre të realizohet me profesionalizëm dhe objektivitet. Mbështetja me fondet publike duhet të shtohet, për të arritur në të paktën 10% të PBB- së për të dy sektorët, brenda një periudhe dhjetëvjeçare. Parimi i shpërndarjes së fondeve publike duhet të jetë “Paraja ndjek individin”, duke mundësuar presionin e qytetarëve për të reformuar dhe modernizuar shërbimet publike.

REFORMA 10 - Paketa e nevojave bazë

Një pension social për të gjithë qytetarët dhe banorët e zonave rurale në moshën mbi 65- vjeçare, me një shumë 100 euro në muaj, të indeksueshme çdo vit me normën e inflacionit, duhet të jetë baza e politikave publike për mbështetjen sociale, e financuar nga taksat. Këtu do të përfshihen një kompleks masash që shoqëria duhet të vendosë në dispozicion të të “pamundurve”, duke bërë që humbja dhe fitimi i këtij statusi të ishte një procedurë sa më transparente e sa më e plotë. Kjo paketë dinjiteti do të përbënte një siguri për familjet nën kufirin zyrtar të varfërisë, për nevojat e tyre bazike, si arsimimi, ushqimi, vaksinat dhe strehimi.