Rriten pagat e pedagogëve, zbardhet shtesa për çdo kategori
Rama: 5 milionë USD për universitetet, pagat rriten si asnjëherë
I gjithë personeli akademik bashkë me punonjësit e tjerë në universitete, pas gjashtë muajsh do të marrin së paku 15% më shumë mbi pagën aktuale.
Kjo rritje prek lektorët deri te titullarët e institucioneve, por më shumë punonjësit që aktualisht trajtohen me pagë minimale, të cilët do të përfitojnë deri në 35% më tepër. "Për vitin 2017 ne do t'i rrisim pagat e pedagogëve, siç nuk janë rritur asnjëherë më parë. Nga fondi i përgjithshëm i rritjes për arsimin, 18 milionë dollarë, vetëm universiteti do të marrë 5 milionë. Profesori i universitetit do të marrë 139 mijë lekë të vjetër më shumë në muaj, ndërsa rektori 103 mijë lekë më shumë", vuri në dukje kryeministri Edi Rama, dje gjatë takimit me pedagogë. Ndërsa shtesa mbi pagë u konkretizua nga rektori i Universitetit të Tiranës, Mynyr Koni gjatë një komunikimi në distancë. "Faleminderit që ma lehtësuat premtimin tim. Nga 30% ( rritja e premtuar) më ngelet vetëm 15%. Ju falënderoj në emër të stafit akademik dhe shpresoj që konstatimi juaj të na përmbushni të plotë të 12 muajt e vitit të ardhshëm". Bazuar në vendimin e fundit të qeverisë për pagat për çdo pozicion, në tabelën përbri shkrimit gazeta boton të plotë tabelën me pagat e reja të personelit akademik. Kështu, paga minimale, ajo e një lektori, i kalon 75 mijë lekë të rinj, ndërsa paga e titullarit të institucionit do të jetë sa dyfishi i këtij të fundit. REFORMA NË ARSIM Nga Universiteti Politeknik, në takimin me dhjetëra profesorë, Kryeministri Rama gjeti rastin të përsëriste se reforma e ndërmarrë nga qeveria e tij bëri kthesë historike në arsim, ndërsa lajmëroi një tjetër ndryshim rrënjësor në kurrikulën e gjimnazeve. "Ky vit shënon fillimin e zbatimit të reformës në arsim, duke mos lejuar që shteti me politikën e vet arsimore të detyrojë një 15- vjeçar të zgjedhë në atë moshë se çfarë do të bëhet dhe të jetë peng i asaj zgjedhjeje për gjithë jetën". Në takimin për më shumë se një orë, kreu i Qeverisë dhe ministrja Lindita Nikolla dhanë mendimet e tyre për skemën e pranimeve në universitete, që sa vjen e do të bëhet më e vështirë. "Ky është fillimi i një procesi ku konkurrenca duhet të ashpërsohet vit pas viti për të siguruar që kush del nga uni- versiteti është një shërbëtor i ditur i këtij populli", vuri në dukje Kryeministri. Pavarësisht bindjes se ajo që po ndodh me pranimet është gjëja e duhur, Rama vuri në dukje se sistemi ka nevojë të përsoset në drejtim të kohës pas shpalljes së fituesve. "Në krahasim me çfarë ne pretendojmë, mund të bëjmë akoma për ta shkurtuar kohën, mbase duke shkurtuar procesin e ankimimit, përderisa sistemi ka provuar të jetë shumë solid". Në përgjigje të akuzave për publikimin e shifrave të regjistrimeve, Kryeministri tha se deri dje në universitetet publike figurojnë të regjistruar 16.121 studentë, ndërsa te privatët 4.249, përkatësisht 70% dhe 40% të kuotave të vëna në dispozicion.