Emrat e rinj të PS në krye të qarqeve, Rama: Deputetët të mos mungojnë
“Intensifikoni takimet me zgjedhësit, shpjegojuni si e gjetëm vendin në 2013 dhe reformat e vështira që kemi bërë”
Mungesa e votave në Parlament ka detyruar Kryeministrin Rama të tërheqë vëmendjen e deputetëve që të mos mungojnë ditën e seancës plenare në Kuvend. Rama i ka kërkuar kreut të Grupit Parlamentar socialist, Gramoz Ruçi, që të disiplinojë udhëtimet jashtë shtetit të deputetëve që, të shpërndarë në delegacione parlamentare marrin pjesë në aktivitete jashtë vendit, duke krijuar vështirësi në seancën plenare në realizimin e kuorumit të nevojshëm për miratimin e ligjeve. Duke kujtuar rregullin që ka vendosur me kabinetin e tij, Kryeministri Rama u ka kujtuar deputetëve se edhe pse ata nuk kanë të drejtë vote në Parlament, për shkak se kanë dorëzuar mandatin e tyre, ata nuk mungojnë të enjteve, ndërsa e kundërta ndodh me deputetët. Në disa seanca Parlamenti është detyruar të mbyllë punimet e tij pa votuar projektligjet e rendit të ditës për shkak të mungesës së deputetëve. Edhe ligji për organizimin dhe funksionimin e pushtetit gjyqësor, si pjesë e paketës së Reformës në Drejtësi, ende nuk është miratuar në Kuvend për shkak të mungesës së 84 votave. Por në mbledhjen e djeshme të Grupit Parlamentar socialist, kreu i PS- së u ka kërkuar deputetëve ta konsiderojnë periudhën e mbetur të këtij mandati si periudhë përgatitore për fushatën zgjedhore të 2017- s. Gjendja në të cilën kjo maxhorancë e gjeti vendin dhe reformat e forta të qeverisë, sipas Kryeministrit, duhen sqaruar në komunitetet ku ata shkojnë. Po ashtu, një porosi tjetër e Ramës ishte edhe ndihma konkrete që deputetët duhet t’u japin, sidomos fermerëve, të cilët duhet të aplikojnë për të përfituar nga fondi i garancisë për kreditim, por dhe një ndjekje sistematike të procesit të marrjes së pronësisë për tokat bujqësore.