“Dhurova ish- Vollgën, Shullazi më vuri armën në bark”
Dëshmia e biznesmenit Beqja: Më kërkoi me dhunë 670 mijë euro, kur mori vesh që kisha shitur një pjesë të pronës
Detaje të reja dhe të frikshme janë zbardhur nga dëshmia e biznesmenit Ylvi Beqja, i cili “fundosi” anëtarët e grupit të Emiljano Shullazit.
Sipërmarrësi që ka përfaqësuar pronarët e ish- hotel “Vollga” në Durrës ka dëshmuar për prokurorët se Emiljano Shullazi i ka kërkuar rreth 700 mijë euro dhe 30 për qind të pronësisë së objektit në Durrës, duke i vënë armën në bark. Ngjarjet kanë ndodhur në vitin 2014, pasi Beqja ishte takuar në verën e atij viti me Shullazin në makinën e tij të blinduar në Tiranë, diku te “21 Dhjetori”. Biznesmeni ka thënë se e takoi Shullazin pasi po ndeshte problem pa fund me gjykatat në Durrës, në lidhje me konfliktet e pronësisë mbi ish- hotel “Vollgën”. TAKIMI ME SHULLAZIN
“Pasi humbëm gjyqet në Gjykatën e Apelit në Durrës, avokati më rekomandoi të kontaktoja Emiljano Shullazin. E kontaktova dhe u takuam në makinën e tij të blinduar diku pas pallatit nr. 40, në Rrugën e Kavajës”, ka dëshmuar biznesmeni, që tashmë ka marrë statusin e bashkëpunëtorit të drejtësisë. Ai ka bërë me dije se Shullazi pranoi ta ndihmonte në konfliktet e problemet e pronësisë së ish- hotel “Vollgës”, duke kërkuar që bëhej pronar i 20 për qind të objektit. Për këtë arsye ata vendosën që biznesmeni Ylvi Beqja, si përfaqësues i pronarëve arabë të ish” Vollgës”, të firmoste në Durrës kontratën e dhurimit të 20 për qind të pronës për Emiljano Shullazin. Kontrata e parë është firmosur në gusht 2014, ku Ylvi Beqja ka shpjeguar se ka nënshkruar premtimin që pas regjistrimit të pronës në Hipotekë t’i dorëzonte Shullazit 20 për qind të pronës. Pasi ndodhi kjo, dhe pas regjistrimit të certifikatës së pronësisë, Ylvi Beqja i shet menjëherë familjes Kodra 30 për qind të ish- hotel “Vollgës”, kundrejt shumës 671 mijë euro. Ndërkohë, Ylvi Beqja takohet me Shullazin në Durrës për të firmosur pjesën e pronësisë që do të përfitonte me akt dhurimi nga biznesmeni. KËRCËNIMI NË DURRËS
Kur kishin qenë te noterja, ajo i kishte thënë Ylvi Beqjes se “familja Kodra i kaloi 670 mijë eurot” si pagesë për pjesën e pronës që kishte blerë kjo familje. Sipas dëshmisë së biznesmenit, këtë gjë e dëgjon Emiljano Shullazi që ishte prezent dhe i thotë Beqjes: “Çfarë janë këto lekë, me kë tallesh ti?”. Në këtë moment, sipas biznesmenit, Shullazi ka nxjerrë armën pis- toletë dhe ia ka vënë në bark, duke i thënë do të më japësh 30 për qind të pronës dhe 670 mijë eurot. Ditën kur ka ndodhur ngjarja në zyrën noteriale, Shullazi kishte ulur qepenin e këtij ambienti që të mos dukej se ç’po ndodhte Brenda. I ndodhur nën këto kërcënime, në total Beqja i ka dhënë Shullazit dhe njerëzve të tij rreth 550 mijë euro, nga të cilat 400 kesh dhe 150 mijë të fundit me çeqe bankare të lëshuara në dhjetor 2014. Në dëshminë e tij, biznesmeni ka thënë se Shullazi shoqërohej nga një grup personash gjatë lëvizjeve të tij në Durrës dhe disa prej tyre ishin të armatosur. Prokuroria ka dokumentuar se në gjithë kërcënimet që i janë bërë biznesmenit Ylvi Beqja, Emiljano Shullazi ka qenë i shoqëruar nga Gilmando Dani, i dyshuar si bashkëpunëtor i ngushtë i tij.
BEQJA- SHULLAZI Në vitin 2014, biznesmeni Ylvi Beqja, në cilësinë e administratorit të “Saudi Brothers”, i ka dhuruar Emiljano Shullazit “në shenjë mirënjohjeje” 749 metra katrorë truall brenda sipërfaqes ku ndodhet ish- hotel “Vollga”. Shullazi u bë kështu pronar i 20 për qind të pronës në fjalë, ndërsa për këtë prokuroria dyshoi që në fillim se nuk bëhej fjalë për një “dhuratë”, por për diçka të marrë me anë të kërcënimeve. Një gjë të tillë duket se biznesmeni e ka konfirmuar pas arrestimit të Emiljano Shullazit. Kërcënimet e vazhdueshme të atij vetë dhe të familjarëve kishin qenë me sa duket edhe shkaku i largimit nga Shqipëria të Ylvi Beqjes, i cili nuk ka qenë në atdhe në kohën kur u arrestua Shullazi.