“Të majtët dhe të djathtët më hoqën mandatin”
Kokëdhima: Lista e të deleguarve të Kryesisë s’është sinjifikative
Ish- deputeti socialist, Koço Kokëdhima, akuzoi dje të majtët dhe të djathtët se lobuan në Gjykatën Kushtetuese për t’i hequr atij mandatin. I ftuar në studion e “Opinionit”, Kokëdhima tha se do ta ndjekë këtë çështje deri në Gjykatën e Strasburgut. I pyetur se cila do të jetë e ardhmja e tij politike, duke i kujtuar se Kryesia e PS- së e ka hequr nga lista e të deleguarve në qarqe, Kokëdhima u përgjigj se e ka të qartë rrugën e tij. “Unë jam i majtë në bindje, jam socialist, që do të punoj gjithë kohën në PS, për PS- në dhe për të majtën e bashkuar. E kam të qartë rrugën time. Unë nuk negocioj liritë e mia. Ajo listë që ju përmendët nuk është sinjifikative për mua”, u shpreh Kokëdhima. I pyetur se a është Edi Rama mik i tij, ish- deputeti socialist tha se “Edi Rama është miku im, dhe do të jetë miku im. Unë jam njeri besnik dhe nuk zhgënjej asnjë njeri në jetë”. Kokëdhima e ka cilësuar të ndikuar politikisht vendimin e Gjykatës Kushtetuese për heqjen e mandatit të tij si deputet. “Vendimi i Gjykatës Kushtetuese është i ndikuar politikisht. Është një vendim që koha do ta vërtetojë. Është bërë vetëm një herë, është bërë vetëm për mua dhe nuk do të ndodhë më”, tha Kokëdhima. Ai u shpreh se kanë qenë të majtë dhe të djathtë që kanë ndikuar për këtë vendim. “Gjykatën Kushtetuese e kanë përdorur kundër meje të djathtët dhe të majtët. Kjo është përgjigja ime”, tha Kokëdhima. I pyetur nëse ka qenë kryetari i Kuvendit që ka ndikuar në vendimin e Gjykatës Kushtetuese, ish- deputeti socialist e mohoi si të vërtetë. “Heqja e mandatit nuk ndikon fare në jetën time. Por njerëz që kanë ndikuar për këtë vendim, janë përpjekur që të më përdorin mua duke sulmuar herë njërin dhe herë tjetrin. Absolutisht nuk përdorem dhe absolutisht nuk e akuzoj”, tha Kokëdhima. Ai u shpreh se do ta kërkojë të drejtën e tij deri në Gjykatën e Strasburgut. “E kam çuar në Strasburg dhe po pres vendimin me qetësi”, tha Kokëdhima. Ish- deputeti socialist shprehu rezerva dhe kritika ndaj mënyrës se si u bë Reforma në Drejtësi, ndërsa nuk kurseu dhe akuzat ndaj ambasadorëve të huaj që asistuan këtë reformë. “Nuk mund të bëjmë 7 ligje në një ditë, pa bërë asnjë diskutim publik dhe dëgjesa publike dhe asnjë argumentim, por merri ligjet, vendosi në tavolinë dhe miratoji. Kjo nuk është një republikë parlamentare, por një partitokraci dhe ambasadorokraci. Vajtja e ambasadorëve në grupet parlamentare, marrja e deputetëve veçmas duke i trajtuar si punëtorë krahu dhe jo si deputetët e popullit. Ambasadorët nuk zgjidhen nga populli shqiptar, ata janë të ngarkuar nga shtetet e tyre dhe duhet të kenë respekt për përfaqësuesit e këtij populli. Nuk mund të ndryshojë Kushtetuta e vendit duke rekrutuar deputetët. Unë kërkova një reformë konsensuale”, tha Kokëdhima.