Vetingu, gjyqtarët: Të bëhemi palë me PD në Kushtetuese
“Drejtorë bankash luajnë bixhoz me paratë e qytetarëve”
Unioni i Gjyqtarëve të Shqipërisë kërkon të bëhet palë në gjykimin e padisë së depozituar nga Partia Demokratike në Gjyka tën Kushtetuese për pezullimin e ligjit të vetingut.
Gati tri javë pas ankimit të bërë nga opozita, Unioni i Gjyqtarëve iu drejtua dje me një kërkesë Gjykatës Kushtetuese në lidhje me këtë fakt. Në kërkesën e depozituar UGJSH i kërkoi Kushtetueses ta regjistrojë si palë të interesuar në shqyrtimin e ankimimit të PD- së për vetingun. Sipas kreut të Unionit të Gjyqtarëve të Shqipërisë, vendimi për t'u bërë palë në gjykimin e kësaj padie është marrë në mbledhjen e fundit të Unionit, të zhvilluar javën e kaluar. "Ky ligj dhe gjykim prek drejtpërdrejt interesat e anëtarëve të Unionit. Në mbledhjen e javës që shkoi, bordi i Unionit të Gjyqtarëve të Shqipërisë mori vendimin që të paraqesë në Gjykatën Kushtetuese një kërkesë për t'u thirrur dhe pranuar si subjekt i interesuar në këtë gjykim", sqaroi në një prononcim për median gjyqtari Gerd Hoxha. Kreu i këtij organizmi të gjyqtarëve sqaroi se ende nuk është përcaktuar qëndrimi që anëtarët e Unionit do të mbajnë në Kushtetuese. Sipas tij, kjo do të përcaktohet në mbledhjen e radhës së UGJSH, e përcaktuar për t'u mbajtur në orën 17: 00 të datës 4 nëntor 2016. "Sa u përket detajeve, unë rezervohem të shprehem për dy arsye: së pari, do të presim vendimin e Gjykatës Kushtetuese nëse do të na pranojë si subjekt të interesuar dhe së dyti, do të presim punimet e asamblesë së zakonshme të Unionit të Gjyqtarëve të Shqipërisë".
DEKLARATA PER BANKAT
Kreu i Unionit të gjyqtarëve, Gerd Hoxha, ditën e djeshme ka bërë edhe një deklaratë të fortë, ku ka thënë se ka raste kur drejtorë bankash luajnë bixhoz me paratë e shqiptarëve. "Ka plot vendime gjyqësore për njerëz në banka me lidhje me klientët për procedura dhe afera korruptive. Ashtu sikurse ka edhe drejtues bankash, dhe për ta ka vendime që janë të dashuruar me këto lojërat e fatit dhe luajnë bixhoz me paratë e qytetarëve" deklaroi Hoxha gjatë takimit për problematikën e kredive të këqija të organizuar nga Dhoma e Përmbaruesve Privatë në Tiranë.