Gjykata e Lartë vulos pushimin e hetimit për Gjiknurin

TIRANE - Kallëzimi i Kontrollit të Lartë të Shtetit ndaj ish- ministrit të Energjetikës, Damian Gjiknuri dhe Avokates së Shtetit, Alma Hicka, për mënyrën e zgjidhjes me mirëkuptim të marrëveshjes së qeverisë me CEZ- in, nuk do të hetohet më nga Prokuroria e Përgjithshme. Gjykata e Lartë rrëzoi dje kërkesën e KLSH- së për rihapjen e këtij hetimi. KLSH- ja kundërshtoi në Gjykatën e Lartë vendimin e Prokurorisë së Përgjithshme të qershorit 2016 për pushim të hetimit ndaj Gjiknurit dhe Hickës. Verdikti i djeshëm i Gjykatës së Lartë u lexua vetëm me dispozitiv, ndërsa në ditët në vijim pritet të zbardhet argumentimi i Kolegjit Penal. Në seancën e parafundit, përfaqësuesit e KLSH- së pretenduan se Prokuroria e Përgjithshme nuk kishte bërë hetim të plotë për rastin në fjalë. Sipas tyre, zgjidhja me mirëkuptim e marrëveshjes me CEZ, me qëllim shmangien e arbitrazhit, i ka shkaktuar shtetit shqiptar një dëm ekonomik prej 470 milionë eurosh. Në atë seancë përfaqësuesit ligjorë të KLSH- së thanë se Prokuroria nuk kishte administruar dokumentacion shtesë. Kundër pretendimeve të tyre u shpreh përfaqësuesi i Prokurorisë së Përgjithshme. Ai këmbënguli para Kolegjit Penal se nga ana e organit të Akuzës ishin kryer të gjitha veprimet e nevojshme hetimore, nga të cilat ka rezultuar se nuk ka pasur elementë të "shpërdorimit të detyrës" nga ana e të kallëzuarve Gjinkuri dhe Hicka. Kallëzimi i KLSH- së për dy zyrtarët e lartë u bë në tetor të vitit 2015, ndërsa vendimi i Prokurorisë së Përgjithshme për pushimin e këtij hetimi daton në qershor 2016.