Berisha akuzon Vlahutin: Falsifikimi me përkthimin, akt korruptiv e mafioz

Ish- kryeministri Sali Berisha e cilëson të paprecedentë heshtjen e ambasadores së BE- së në Tiranë, Romana Vlahutin, për atë që e konsideron falsifikim mafioz të ligjit të vetingut. Përmes një reagimi në “Facebook”, Berisha ka deklaruar se falsifikimi përmes përkthimit të ligjit është një akt mafioz e korruptiv pas të cilit fshihet Kryeministri Rama. “Falsifikimi nëpërmjet përkthimit, me shtim fjalish në anglisht që nuk ekzistojnë, në tekstin e neneve të Kushtetutës nuk është standard europian, por antieuropian. Ky është një akt mafioz korruptiv dhe i turpshëm, poshtërues për Shqipërinë, i mafies qeveritare, që meriton ndëshkim. Ekzekutimi i këtij akti korruptiv skandaloz është realizuar nga Rama- Xhafa nëpërmjet segmenteve të caktuara të misionit të Euralius! Por dhe heshtja para këtij skandali të paprecedentë i ambasadores Vlahutin, e njohur tashmë për njëanësinë e saj shembullore me qeverinë, flet jo pak dhe e akuzon dhe këtë të fundit”, deklaroi Berisha. Lidhur me këtë ngjarje, ish- kryeministri i ka bërë thirrje Komisionit Europian të hetojë shkaqet dhe rrethanat e këtij akti korruptiv mafioz të qeverisë në bashkëpunim me segmente të misionit të EURALIUS në Tiranë, që, sipas Berishës, nuk ka asgjë të përbashkët me vlerat dhe parimet europiane.