Droga drejt Turqisë, 25 shqiptarë të dënuar, mes tyre dhe një femër

Historia e 21- vjeçares nga Përmeti, që lindi foshnjën në burg. Për 2.5 kg hashash u dënua me 25 vjet burg

Dënimet e ashpra që parashikon legjislacioni turk për çështjet e drogës, por edhe kontrollet e ashpra në kufi, duket se ua bëjnë të vështirë trafikimin e lëndëve narkotike shtetasve shqiptarë.

Megjithatë të shumtë janë ata që kanë rrezikuar, duke përdorur forma nga më të ndryshmet për të fshehur drogën që trafikonin. Aktualisht në burgjet e Turqisë ndodhen duke vuajtur dënimin 25 shtetas shqiptarë. Mes tyre është edhe një vajzë 21- vjeçare nga Përmeti, e cila është dënuar me 25 vjet burg. Bëhet fjalë për Anxhela Zekollarin, e cila në maj të vitit të kaluar, u arrestua në kufirin mes Turqisë dhe Greqisë, bashkë me të fejuarin e saj. Në trup iu gjet e fshehur një sasi prej 2.5 kg hashash, që e kishte paketuar në formën e një jeleku, të veshur poshtë rrobave. E megjithëse sasia mund të konsiderohet e vogël, krahasuar me rastet e tjera të trafikut ndërkombëtar të drogës, ajo sërish ka marrë dënim maksimal. Madje gjyqtarët turq nuk i ka “zbutur” as fakti që ajo ishte shtatzënë, duke vendosur që ajo të dënohet me 25 vjet heqje lirie. Tashmë ajo ndodhet në burg, bashkë me foshnjën e saj, që për shkak të rrethanave u detyrua ta lindë aty. Avokati shqiptar, Kadri Hoxha, i cili prej shumë vitesh ushtron pro- fesionin e tij në Stamboll, u bën apel bashkatdhetarëve të tij që të mos rrezikojnë të trafikojnë drogë atje, pasi dënimet janë shumë të ashpra dhe askush nuk tolerohet. TRAFIKU I DROGES Sipas avokatit shqiptar, Kadri Hoxha, vitet e fundit janë dyfishuar dënimet për personat që kapen duke futur drogë në territorin e Turqisë. Në një prononcim për gazetën “Panorama”, Hoxha tregon se janë të paktën 25 shqiptarë, mes tyre dhe një femër, që tashmë kanë marrë dënimet e formës së prerë nga Gjykatat turke për veprën e trafikimit të drogës, kryesisht të hashashit. Dënimet për këtë vepër penale, sipas legjislacionit turk, variojnë nga 18 deri në 25 vjet burg, edhe për sasi që në rast se trafikohen në Greqi apo Itali, konsiderohen të vogla. Sh- tetasit shqiptarë që trafikojnë kanabis drejt Turqisë zgjedhin kryesisht transportin rrugor, duke përdorur makinat e tyre private, apo edhe autobusët. Ndërsa pikat e kalimit kufitar, që shpeshherë i kanë zbuluar ata, kanë qenë ato të Ispalas dhe Kapikule. Në shumicën e rasteve, droga është gjetur nëpërmjet kontrollit me rreze infra, kur policët e kufirit i orientojnë automjetet të kalojnë nëpërmjet një tuneli për verifikim. Ndërsa avokati Hoxha shprehet se në momentin e arrestimit, shqiptarët pranojnë se kanë zgjedhur trafikimin e drogës për shkaqe ekonomike. Sasitë e ndryshme të hashashit janë gjetur të fshehura në pjesë të ndryshme të makinave, në goma, brenda produkteve të ndryshme ushqimore, apo edhe poshtë rrobave të fshehura në trup. Ligji turk i ndry- shuar në vitin 2014 nuk jep asnjë lehtësi për rastet e futjes së drogës në Turqi. Edhe pse sasia e drogës mund të jetë e vogël, legjislacioni atje parashikon dënime shumë të ashpra. Hoxha shprehet i shqetësuar, pasi po rritet numri i tentativave të trafikimit të drogave nga Shqipëria drejt territorit turk e po ashtu po rriten edhe rastet e dënimeve të tyre me shumë vite burg.