“Në Kombëtare nuk ka merita, gjërat bëhen për interes”
Jurgen Gjasula mendon se në Kombëtare nuk ka merita dhe shumë gjëra bëhen vetëm për interes. Mesfushori i Grojter Fyrthit shpreh keqardhje që nuk luajti në Kampionatin Europian, por është i ndërgjegjshëm që vendimet i takojnë trajnerit. Gjasula Fyrth “Ndeshjen me Izraelin nuk e ndoqa, vetëm rezultatin pashë. Personalisht, nuk e kuptoj dot se si ka mundësi që lojtarët që luajnë në Gjermani nuk grumbullohen, ndërsa ata lojtarë që as nuk luajnë në ekipe të vetat grumbullohen. Por kjo është diçka që i takon trajnerit dhe më vjen keq ta them, por në Shqipëri bëhen shumë gjëra vetëm për interes! Normale që u mërzita për mungesën në Francë. Kisha shumë dëshirë të luaja për vendin ku kam lindur, me zemër jam 100% shqiptar, por këto gjëra nuk janë në dorën time”, thotë në një intervistën për “Revista Who” futbollisti i lindur në Tiranë. Aktualisht 31- vjeçari ( i mbush pas tri ditësh) është duke u riaftësuar nga një dëmtim i rëndë, që e ka lënë jashtë fushave për disa muaj.